मराठा आरक्षणासंदर्भात राज्य सरकारने हैदराबाद गॅझेट लागू केलं असून या निर्णयाला विरोध करण्यासाठी समता परिषद आणि सकल ओबीसी समाज यांच्याकडून बीडमधील छत्रपती संभाजी महाराज क्रीडांगणावर २८ सप्टेंबर रोजी हा ओबीसी महामेळावा आयोजित केला होता. या मेळाव्यावरून मराठवाड्यात राजकारण तापलं होतं. याबाबत ओबीसी बांधवांना योग्य माहिती व मार्गदर्शन मिळावं यासाठी हा मेळावा आयोजित केला होता. मात्र राज्यात झालेल्या अतिवृष्टी आणि विशेषत: बीड जिल्ह्यामध्ये शेतकऱ्यांचे प्रचंड नुकसान झाल्यामुळे मेळावा पुढे ढकलण्यात आला आहे. मेळाव्याची सुधारित तारीख लवकरच जाहीर केली जाईल, अशी माहिती छगन भुजबळ यांनी व्हिडीओ संदेशाद्वारे दिली आहे.

गेली दहा पंधरा दिवसांपासून महाराष्ट्रात पावसाचे थैमान सुरू आहे. अनेक ठिकाणी महापूर आला आहे. शेतं, गुरं-ढोरं वाहून गेली आहेत. शेतकरी संकटात आहे. अनेकजण मृत्यूमुखी पडले आहेत. बीड शहरात सुद्धा प्रचंड पाऊस पडत आहे. महामेळाव्यासाठी वॉटरप्रूफ मंडपही उभारला होता. परंतु, मंडपात गुडघाभर पाणी आहे, असं तेथील कार्यकर्ते सुभाष राऊत यांनी मला कळवलं. त्यामुळे सद्यस्थितीत हा महामेळावा आपण पुढे ढकलूया, पावसाचा जोर कमी झाल्यावर मेळावा घेऊ, अशी भूमिका भुजबळांनी मांडली.

Pune Kothrud News : ‘हे चालणार नाही…’; खासदार मेधा कुलकर्णींकडून गरबा-दांडिया कार्यक्रम बंद, पुण्यात कोथरूडमध्ये काय घडलं?

लक्ष्मण हाकेंच्या वाहनावर हल्ला

ओबीसी आंदोलक लक्ष्मण हाके यांच्या वाहनावर शनिवारी अहिल्यानगरजवळ हल्ला करण्यात आला आहे. तरुणांनी त्यांच्या मोटारीवर काठ्यांनी हल्ला केल्याने मोटारीच्या काचा फुटल्या. या हल्ल्यात हाके यांचा एक कार्यकर्ता किरकोळ जखमी झाला असून, स्वतः हाके सुरक्षित आहेत. या प्रकरणी पोलिसांनी तिघांना ताब्यात घेतलं असून त्यांच्याविरुद्ध खुनाचा प्रयत्न करणे आणि दंगल केल्याचा गुन्हा दाखल करण्यात आला आहे, अशी माहिती जिल्हा पोलीस अधीक्षक सोमनाथ घार्गे यांनी दिली.

दरम्यान, एका कार्यक्रमासाठी लक्ष्मण हाके जात होते. त्यावेळी दौंडकडून येत असताना अहिल्यानगरजवळच्या अरणगावजवळ त्यांच्या वाहनावर हा हल्ला झाला. याची माहिती मिळाल्यानंतर नगर तालुका पोलिस घटनास्थळी दाखल झाले. हाके यांच्यासोबतही पोलिस होते. त्यांनी हाके यांना वाहनातून सुखरूप बाहेर काढले. त्यानंतर नगर तालुका पोलिस घटनास्थळी दाखल झाले. पोलिसांनी तपास करून तिघांना ताब्यात घेतले. त्यांना नगर तालुका पोलिस ठाण्यात आणण्यात आल्यानंतर दोन्ही बाजूचे कार्यकर्ते तेथे जमल्याने काही काळ तणावाचे वातावरण निर्माण झाले होते.