अकोला जिल्ह्याच्या पातुर तालुक्यातील अंबाशी येथे घरगुती वादातून एकाचा मृत्यू झाल्याची धक्कादायक घटना समोर आली आहे. या घटनेमुळे संपूर्ण परिसरात एकच खळबळ उडाली असून स्थानिक नागरिकांमध्ये भीतीचे वातावरण निर्माण झाले आहे. अंबाशी येथील रहिवासी छाया हिवराळे हिचा विवाह अकोला तालुक्यातील कानशिवणी येथील नागेश गोपनारायण यांच्याशी झाला होता. सध्या नागेश असोला फाटा येथे वास्तव्यास होता. तो सासारवाडीत अंबाशी येथे आला असताना काही कारणावरून सासरवाडीच्या लोकांसोबत घरगुती वाद झाला होता.

शाब्दिक वादाचे रुपांतर हाणामारीत झाले आणि रागाच्या भरात नागेश याच्यावर काठ्यांनी आणि कुर्‍हाडीने प्राणघातक हल्ला चढवला. या हल्ल्यात नागेश गंभीर जखमी झाला, यातच त्याचा मृत्यू झाला. घटनेची माहिती मिळताच पातुर पोलीस व चांनी पोलिसांनी घटनास्थळी धाव घेतली. घटनेची माहिती घेऊन पंचनामा केला व मृतदेह अकोला येथील सर्वोच्च रुग्णालयात शवविच्छेदनासाठी पाठवण्यात आला आहे. पोलिसांनी घटनेचा तपास सुरू केला असून, याप्रकरणी दोन संशयितांना पोलिसांनी ताब्यात घेतल्याची माहिती आहे. यातील आणखी काही आरोपी आहेत का? हा वाद नेमका कशामुळे झाला याचा तपास पोलीस करत आहेत.

या अमानुष वृत्तीच्या घटनेमुळे स्थानिक नागरिकांत संतापाची लाट उसळली आहे. या घटनेने एक कुटुंब उध्वस्त केले आहे. एखादा घरगुती वाद कसा जीवघेणा ठरतो यावर नागरिकांमध्ये आपसूकच चर्चा सुरू झाली आहे. याप्रकरणी पोलीस प्रशासनाने कठोर कारवाई करावी, अशी मागणी केली जात आहे.