एकाच कुटुंबातील पाच जण बेशुद्ध

सोलापूर शहरातील मुख्य झोपडपट्टी असलेल्या लष्कर परिसरातील लोधी गल्ली येथे ही घटना घडली आहे. एकाच कुटुंबातील पाच जण रविवार 31 ऑगस्ट रोजी राहत्या घरी संशयास्पदरित्या बेशुद्ध अवस्थेत आढळून आले होते. सदर बाजार पोलिसांना माहिती मिळताच त्यांना तात्काळ शासकीय रुग्णालयात उपचारासाठी दाखल करण्यात आले. मात्र रात्री उशिरा हर्ष बलरामवाले आणि अक्षरा बलरामवाले या दोन चिमुकल्यांचा उपचारादरम्यान मृत्यू झाला आहे. परंतु मृत्यूचं नेमकं कारण अद्याप समोर आलेलं नाही.

बलरामवाले कुटुंबासोबत नेमकं काय घडलं?

आई, मुलगा, सून आणि दोन लहान मुलं असं बलरामवाले कुटुंब शनिवारी रात्री झोपी गेलं. रविवारी सकाळी गल्लीतील वर्दळ वाढली. नेहमीप्रमाणे सकाळी लवकर उठणाऱ्या बलरामवाले कुटुंबाचा दरवाजा मात्र बंदच होता. दुपारी शेजाऱ्यांना संशय आला, त्यामुळे त्यांनी बलरामवालेंच्या नातेवाईकांना माहिती दिली.

काही वेळाने दार तोडून आत प्रवेश करताच पाचही जण बेशुद्ध अवस्थेत होते, तोंडाला फेस आले होते. सदर बाजार पोलिसांना याबाबत तात्काळ माहिती देण्यात आली. पोलिसांनी सर्व जणांना शासकीय रुग्णालयात उपचारासाठी दाखल केले. रविवारी रात्री हर्ष आणि अक्षरा यांची प्राणज्योत मालवली. तर सासू-सुनेची परिस्थिती नाजूक असून अतिदक्षता विभागात उपचार सुरु आहेत.