पोलिसांनी दिलेल्या माहितीनुसार, पर्वती दर्शन भागात झोपडपट्टी पुनर्वसन योजनेअंतर्गत एका गृहप्रकल्पाचे बांधकाम सुरू आहे. या इमारतीच्या तिसऱ्या मजल्यावर काम करणाऱ्या साकेतचा अचानक तोल गेला. त्यामुळे तो लिफ्टच्या मोकळ्या जागेत पडला. त्याच्या डोक्याला गंभीर दुखापत झाली. त्याला तातडीने रुग्णालयात नेण्यात आले. मात्र, त्याचा मृत्यू झाल्याचे डॉक्टरांनी घोषित केले.
बांधकाम कामगारांना सुरक्षाविषयक साधने न पुरविल्याने साकेतच्या मृत्यूस कारणीभूत ठरल्याप्रकरणी गुन्हा दाखल करण्यात आला आहे. उपनिरीक्षक एस. बी. कोपनर तपास करत आहेत.
बारामती शहरातील भिगवण रस्त्यावर गतिरोधक न दिसल्याने दुचाकी दुभाजकाला घडकून वैद्यकीय शिक्षण घेणाऱ्या शरयू संजय मोरे (वय २२) या विद्यार्थिनीचा मृत्यू झाला. बारामती भिगवण रस्त्यावर ऊर्जा भवननजीक शनिवारी रात्री हा अपघात रात्री साडेदहाच्या दरम्यान झाला. शरयू ही तिच्या एका मैत्रिणीसह दुचाकीवरून शनिवारी रात्री बारामतीतून एमआयडीसीकडे पुण्यश्लोक अहिल्यादेवी होळकर शासकीय वैद्यकीय महाविद्यालयाच्या वसतिगृहाकडे निघाली होती. भिगवण रस्त्यावरील ऊर्जा भवननजीक तिची दुचाकी आली असता, तेथील गतिरोधक दृष्टीस न पडल्याने तिची दुचाकी दुभाजकाला धडकली. यात दुचाकी चालवणाऱ्या शरयूचा जागीच मृत्यू झाला, तर तिची मैत्रीण जखमी झाली.