बारामती लोकसभा मतदारसंघातील भोर-राजगड-मुळशी विधानसभा मतदारसंघांतून भाजपमध्ये मोठ्या प्रमाणावर नेते आणि कार्यकर्त्यांना प्रवेश दिला आहे. विशेष म्हणजे, यामध्ये मुळशी तालुक्यातील प्रवेश लक्षणीय ठरले आहेत. एकीकडे हे प्रवेश होत असताना दुसरीकडे या प्रवेशाच्या वेळेबाबत राजकीय वर्तुळात चांगलीच चर्चा रंगली आहे. कारण, भोरचे आमदार शंकर मांडेकर याच्या वाढदिवशीच त्यांचे प्रभावक्षेत्र असणाऱ्या मुळशी भागातील अनेक नेत्यांनी मुंबईत आयोजित कार्यक्रमात भाजपचा झेंडा हातात घेतला.

Raj Thackeray : दादर कबुतरखाना वाद पेटला! लोढा-बिढा मध्ये येतायत…, जैन मुनींनाही ऐकवलं, राज ठाकरेंची रोखठोक भूमिका

ही घडामोड राष्ट्रवादी काँग्रेससाठी (अजित पवार गट) मुळशी तालुक्यातील मोठा राजकीय धक्का मानली जात आहे. माजी आमदार संग्राम थोपटे यांच्या भाजप प्रवेशानंतर आता त्यांच्या नेतृत्वाखाली मुळशीतील राष्ट्रवादी काँग्रेसच्या चार दिग्गज नेत्यांसह १५ गावांचे सरपंच-उपसरपंच आणि ५० हून अधिक कार्यकर्त्यांनी भारतीय जनता पक्षात प्रवेश केला. त्यामुळे मुळशीतील भाजपची ताकद आणखी वाढल्याचं राजकीय विश्लेषकांचं मत आहे.

प्रवेश घेणाऱ्यांमध्ये माजी सभापती, पीएमआरडीएचे सदस्य, विविध संस्थांचे संचालक आणि विद्यमान सरपंचांचा समावेश आहे. संग्राम थोपटे यांच्या प्रवेशानंतरच मुळशीतील राजकीय समीकरणे बदलू लागली होती. आता राष्ट्रवादी काँग्रेसच्या ( अजित पवार गट) तसेच राष्ट्रवादी काँग्रेस ( शरद पवार गट) या दोन्ही गटांतील महत्त्वाच्या नेत्यांचा भाजप प्रवेश झाल्याने दोन्ही गटांना एकाचवेळी मोठा फटका बसला आहे.

पुढील 8 दिवसांत मला एखादं मोठं पद…; हर्षवर्धन पाटलांच्या विधानाने चर्चांना उधाण, वेगळा निर्णय घेणार?

या प्रवेशांमुळे मिशन बारामतीबाबत भाजप किती गंभीर आहे, यावर राजकीय चर्चांना उधाण आलं आहे. स्थानिक स्वराज्य संस्थांच्या निवडणुकीपूर्वी या मिशनची पायाभरणी करण्यासाठी भाजपने ही रणनीती आखल्याचं बोललं जात आहे.

कोण आहेत प्रवेश घेणारे प्रमुख नेते?

माजी सभापती पांडुरंग ओझरकर, सुखदेव तापकीर, सुरेश हुलावळे, अमित कंधारे, पांडुरंग राक्षे आणि मोरेश्वर घारे यांचा यात समावेश आहे. त्यांच्या पक्षप्रवेशावेळी ग्रामविकास मंत्री जयकुमार गोरे, माजी आमदार संग्राम थोपटे, आमदार प्रसाद लाड, प्रदेश सरचिटणीस आमदार विक्रांत पाटील, माधवी नाईक, माध्यम विभाग प्रमुख नवनाथ बन आणि कार्यालय सहसचिव भरत राऊत उपस्थित होते.