“सूरज चव्हाण यांना मी धडा शिकवणारच, असा निर्धार मी केला होता. त्यांनी मुद्दामहून माझ्याविरुद्ध सातत्याने खालच्या दर्जाची वक्तव्ये केली. खूप खूप संताप आला, म्हणून त्यांच्या विरोधात मी दावा दाखल केला आहे. उद्या वांद्रे कोर्टात, सकाळी 11 वाजता या केसची सुनावणी होणार आहे”, असं अंजली दमानिया म्हणाल्या आहेत. अंजली दमानिया यांनी आपल्या ट्विटसोबत एका वृत्तवाहिनीला दिलेल्या जुन्या मुलाखतीची लिंक देखील शेअर केली आहे. यामध्ये त्यांनी सूरज चव्हाण यांना धडा शिकवणार असं म्हटलं होतं.

अंजली दमानिया सूरज चव्हाणांबद्दल काय म्हणाल्या होत्या?

“प्रत्येक पक्षाने आणि नेत्यांनी असे राम आणि शाम लोकं ठेवलेली आहेत. म्हणजे आज मुख्यमंत्री देवेंद्र फडणवीस यांच्या विरोधात बोललं की भाजपचे प्रवीण दरेकर आणि प्रसाद लाड बाहेर येतात आणि ताबोडतोब बोलायला सुरुवात करतात. तसंच उपमुख्यमंत्री अजित पवार यांच्याबद्दल तुम्ही चकार शब्द जरी काढला तरी अमोल मिटकरी आणि सूरज चव्हाण हे वाट्टेल ते बोलतात. त्यांना बोलायचं ताडतंत्र नाही. विशेषत: सूरज चव्हाण यांना नाही”, असं अंजली दमानिया म्हणाल्या होत्या.

“मिटकरी माझ्याबद्दल आतापर्यंत तसं वाईट बोलले नव्हते. त्यांनी फक्त सांगितलं की, बाहेर जातात की ह्यांच्याकडे पैसे कुठून येतात? त्यांनी कदाचित गुगल केलं असेल. पण सूरज चव्हाण यांचा इतका संताप येतो. आता ह्यांना सरळ करायचं आहे. ह्यानाच नाही तर तर ह्यांच्या मालकांना सरळ करायचं आहे. मी किती तत्ववान आहे हे अजित पवार, सुनील तटकरे, छगन भुजबळ या सर्वांना माहिती आहे. पण हे सूरज चव्हाण यांना युवा मोर्चातून काहीतरी दाखवायचं असेल. मी तुमच्यासाठी लढतोय दादा हे त्यांना दाखवायचं असेल. आता मला रितसर धडा शिकवायचा आहे”, असा इशारा अंजली दमानिया यांनी दिला होता.