मंगेश चव्हाण काय म्हणाले?

“एकनाथ खडसे यांनी स्वत: प्रफुल्ल लोढा यांच्यावर टीका केली होती. प्रफुल्ल लोढा यांनी खडसेंच्या मुलाच्या मृत्यूबाबत प्रश्न उपस्थित केले तेव्हा तो मुर्ख माणूस आहे, असं त्यांनी सांगितलं होतं. तोच व्यक्ती जेव्हा गिरीश महाजन यांच्यावर आरोप करत होता तो तुम्हाला गोड वाटत होतं. खडसे साहेब आपण जे पेराल तेच उगवतं. कुठेतरी तुम्हाला मन:शांतीची गरज आहे. खरंतर तुमचं वय वाढलं आहे. आम्ही तर परमेश्वराला विनंती करुच की, तुम्हाला परमेश्वरांना जास्त आयुष्य दिलं पाहिजे. कारण तुमच्या डोळ्यांसमोर भाजपचे कर्तृत्वान नेते कशाप्रकारे सक्षमपणे काम करत आहेत, ते बघायला देखील कुणीतरी असलं पाहिजे”, असं मंगेश चव्हाण म्हणाले.

‘तर आपल्याला बाहेर तोंड काढायला जागा राहणार नाही’

“तुम्ही ज्यावेळेस प्रफुल्ल लोढाच्या गोष्टी सांगितल्या की, त्याने मला गाडीत बोलावलं. त्याच्याकडे सीडी आहे. राज्याच्या विरोधी पक्षनेत्यापासून ते स्वयंघोषित मुख्यमंत्रीपदाची स्वप्न आपण पाहिली. स्वप्न पाहणे यात दुमत नाही. पण एखादा दारुड्या तुम्हाला गाडीत काही सांगतो आणि तुम्ही स्वत:ला राज्यातला एवढा मोठा नेता समजता, तुम्ही जाहीरपणे एखाद्या नेत्यावर आरोप करता. माझं तुम्हाला सांगण आहे की, तुमच्याच मतदारसंघातील एका व्यक्तीने तुमच्या संदर्भात काही गोष्टी सांगितल्या आहेत. त्याची मी जाहीर वाच्यता केली तर आपल्याला बाहेर तोंड काढायला जागा राहणार नाही”, असा घणाघात मंगेश चव्हाण यांनी केला.

‘खडसेंनी अनेक महिलांशी अनैतिक संबंध ठेवले’, गंभीर आरोप

“मी त्या व्यक्तीला तुमच्यासमोर जाहीर पत्रकार परिषदेला देखील आणतो. त्याने मला असं सांगितलं की, एकनाथ खडसे हा अतिशय खालच्या स्तराचा विचार करणारा नेता आहे. हा घरात देखील घेण्याच्या लायकीचा नेता नाही. त्यांनी मला असं सांगितलं, मी ह्यांना अतिशय जवळून पाहतो. 20 वर्षाच्या इतिहासात ह्यांनी अनेक लोकांना संपवलं. जवळच्या लोकांना त्रास दिला. हे त्यांनी राजकारणात तर केलंच. पण व्यक्ती म्हणून ही विकृती आहे. ह्यांनी अनेक महिलांशी अनैतिक संबंध ठेवले. हे मी अतिशय जबाबदारीने सांगतोय”, असे खळबळजनक आरोप मंगेश चव्हाण यांनी केले.

“जसं तुम्ही लोढाचं सांगितलं की, लोढांनी तुम्हाला सांगितलं म्हणून तुम्ही आरोप करत आहात. तुमच्या विरोधात देखील मला अशाच लोकांनी सांगितलं आहे. अगदी एकनाथ खडसे यांचे परसंबंध होते. त्या महिला रात्र रात्र यांच्याकडे येऊन राहायच्या. सकाळी सोडायला लोकं जायच्या. तो बघणारा व्यक्ती असं मला सांगत होता”, असा दावा मंगेश चव्हाण यांनी केला.

“आता मी तुम्हाला असे आरोप केले की, तुमचे सुद्धा अनेक महिलांशी संबंध होते. तर तुम्हाला काय वाटेल? कदाचित ते आरोप तथ्यहीन असतील. असतील किंवा नसतील हा वेगळा प्रश्न आहे. पण माझ्याकडे जोपर्यंत पुरावा नाही तोपर्यंत ते आरोप मांडता कामा नये. राज्यातील विधानसभेचा एखादा सदस्य, मंत्री, माजी मंत्री जेव्हा बोलतो तेव्हा त्याच्याकडे पुरावा असला पाहिजे. आपल्याकडे कोणताही पुरावा नसताना, आपण वारंवार गिरीश महाजन यांच्या चारित्र्याचे हनन करता. माझी आपल्याला विनंती आहे. आपण कुठल्याही मुद्द्यावर समोरासमोर यावे. गिरीश महाजन यांचा प्रतिमा मलिन करण्याचा प्रयत्न करत आहात तो लज्जास्पद आहे”, अशी टीका मंगेश चव्हाण यांनी केली होती.