मुख्यमंत्री आणि ‘पीएमआरडीए’चे अध्यक्ष देवेंद्र फडणवीस यांच्या अध्यक्षतेखाली १२ फेब्रुवारी रोजी झालेल्या बैठकीत आगामी आर्थिक वर्षासाठीचा (सन २०२५-२६) ४५०३ कोटी रुपयांच्या अर्थसंकल्पाला मंजुरी देण्यात आली होती. या अर्थसंकल्पात शहर आणि ग्रामीण भागातील दळणवळण गतिमान करण्यासाठी भर देण्यात आला आहे. त्यानुसार शिरूरमधील रांजणगाव, मुळशीमधील हिंजवडी आणि पिरंगुट या औद्योगिक क्षेत्रातील रस्त्यांसाठी २०३.७८ कोटी रुपयांच्या निधीची तरतूद करण्यात आली आहे. त्यानुसार, ही कामे सुरू करण्यात आली आहेत. यामध्ये प्रमुख जिल्हा मार्गामधील रस्त्यांची कामे, नव्याने रस्त्याचे काम हाती घेणे, कनेक्टिव्हिटीसाठी निधी देण्यात आला आहे.
तोट्यातील मार्गावर फुली; उत्पन्नवाढीसाठी पीएमपीकडून मार्गांत बदल; ६४ नव्या मार्गांवर सेवा सुरु

हिंजवडीतील रस्त्यांना निधी

म्हाळुंगे ते ते हिंजवडी फेज एक या दम्यानचा दीड किलोमीटरचा रस्ता विकसित करण्यात येणार आहे. या रस्त्याची रुंदी ३६ मीटर असून १३.०५ कोटी रुपयांचा खर्च अपेक्षित आहे. ठाकर वस्ती ते माण गावठाण या दरम्यानच्या २.४० किलोमीटरच्या आणि १८ मीटर रुंदीच्या रस्त्याचे काम हाती घेण्यात आले आहे. त्यासाठी २०.८८ कोटी खर्च येणार आहे. सूर्या रुग्णालय लय ते ठाकर वस्ती या साडेतीन किलोमीटरच्या रस्त्याचेही काम सुरू करण्यात आले आहे. यासाठी ३०.४५ कोटी रुपयांचा खर्च अपेक्षित आहे. या तिन्ही रस्त्यांची भूसंपादन प्रक्रिया सुरू करण्यात आली आहे.

३७ कोटींच्या रस्त्यांची कामे

पिरंगुट औद्योगिक क्षेत्रातील तीन रस्त्यांची कामे सुरू करण्यात आली आहे. त्यामध्ये उरवडे ते हिंजवडी फेज तीन हा ७.१० किलोमीटरचा रस्ता विकसित करण्यात येत आहे. या रस्त्याची रुंदी ४५ मीटर असून, त्याकरिता १४.५० कोटी रुपये खर्च येणार आहे. नांदे ते लवळे या ३.९३ किलोमीटरच्या रस्त्याची रुंदी ४५ मीटर असून, आठ कोटींचा खर्च अपेक्षित आहे. नांदे ते माण या नवीन दीड किमीच्या रस्त्यासाठी १५ कोटीं खर्च अपेक्षित आहे. या रस्त्यांमुळे औद्योगिक क्षेत्रांतील दळणवळण सुखकर होऊन उद्योगधंद्यांना मदत होणार आहे. जिल्ह्यातील औद्योगिक क्षेत्रांत मोठमोठे उद्योग येत असून, त्यांनाही या पायाभूत सुविधांचा उपयोग होणार आहे.