याबाबत अधिक माहिती अशी की, दीड महिन्यांपूर्वीच मोटारसायकलवरून घसरून दीपक पाटील यांचा अपघात झाला होता. त्यामुळे डॉक्टरांनी त्यांना मोटारसायकल चालवू नये, असा सल्ला दिला होता. त्यामुळे दीपक पाटील यांची मुलगी भाग्यश्री ही त्यांना दूध व्यवसायासाठी मदत करत होती. नेहमीप्रमाणे भाग्यश्री सोमवारी रात्री साडेआठ वाजताच्या सुमारास मोटारसायकल (क्रमांक- एम एच १९ ,ई बी ६०२७) वर दुधाचे कॅन घेऊन अमळनेर इथं येत असताना लोंढवे शिवारात अज्ञात वाहनाने कट मारल्याने मोटरसायकल रस्त्यावर आडव्या पडलेल्या झाडावर जाऊन आदळली. या अपघातात मोटारसायलवरून खाली पडून भाग्यश्रीच्या डोक्याला मार लागून रक्तस्राव झाला होता. भूषण पाटील यांनी जानवे गावात माहिती कळवल्यावर गावातील लोकांनी तिला उचलून दवाखान्यात नेले. मात्र तिथे डॉक्टरांनी तिला मृत घोषित केले.

वडिलांना साथ देण्यासाठी काबाडकष्ट, पण काळाने केला घात…

भाग्यश्री पाटील ही तरुणी एकीकडे शिक्षण पूर्ण करत असताना दुसरीकडे आपल्या वडिलांना दुग्ध व्यवसायात हातभार लावत होती. मोटारसायकलला दुधाचे कॅन बांधून एकटी जानव्याहून कधी धुळे तर कधी अमळनेर हा तिचा नित्यक्रम झाला होता. सुरुवातीला वडिलांसोबत संकलन केलेल्या दुधाचे ती वाटप करत असत. त्यानंतर हळूहळू भाग्यश्रीने धाडस करत मोटारसायकलवर दूध घेऊन जाणे सुरू केले. यामुळे तिच्आ वडिलांना तिची चांगलीच मदत होत होती. शिवाय तिच्या मदतीमुळे दूध व्यवसायात भरभराट देखील झाली होती. मात्र आता तिचा अपघाती मृत्यू झाल्याने कुटुंबावर दु:खाचा डोंगर कोसळला आहे.

दरम्यान, नितीन पाटील यांच्या फिर्यादीवरून अमळनेर पोलीस स्टेशनला अज्ञात वाहन चालकाविरुद्ध मृत्यूस कारणीभूत ठरल्याप्रकरणी गुन्हा दाखल करण्यात आला आहे. काही दिवसांपूर्वी भाग्यश्रीच्या वडिलांच्या गाडीला अपघात होऊन ते जखमी झाले असताना आता भाग्यश्रीदेखील मोटारसायकल अपघातात जीव मृत्युमुखी पडल्याने संपूर्ण तालुक्यात हळहळ व्यक्त होत आहे.