“एकनाथ शिंदे यांना शिवसेनाप्रमुख बाळासाहेब ठाकरे असल्यापासून अगदी शिवसेनेचे कार्यकर्ते असल्यापासून त्यांना मी ओळखतो. मला त्यांच्याबद्दल अतिशय आदर आहे आणि अभिमान आहे की, ते माझे मित्र आहेत. ही मैत्री अजूनपर्यंत टिकून आहे. मी त्यांच्याकडे वैयक्तिक काही मागितलं नाही. तशी वेळ येत नाही. देवाने आपल्याला इतकं भरभरुन दिलेलं आहे”, असं नाना पाटेकर म्हणाले.

‘एकनाथ शिंदे यांच्याबद्दल काही वाटलं नसतं तर…’

“राजकारणात खूप कमी व्यक्ती आहेत की, ज्यांच्यावर कुठले ठपके नाहीत, त्यापैकी एकनाथ शिंदे हे गृहस्थ आहेत. त्यामुळे त्यांच्याबद्दल मला अतिशय आदर आहे. ते खूप सुंदर आहेत”, अशी भावना नाना पाटेकर यांनी व्यक्त केली. “मला एकनाथ शिंदे यांच्याबद्दल काही वाटलं नसतं तर मी इथे आलोच नसतो. काय असतं, काही मित्र असे असतात, ज्यांच्याकडे बघितल्यानंतर आपल्याला अतिशय समाधान वाटतं”, असंही नाना पाटेकर म्हणाले.

‘एकनाथ शिंदेंना मी खूप आधीपासून ओळखतो’

“राजकारणातला एखादा माणूस सातत्याने काम करत असेल तर काय पाहिजे? ज्याच्यावर कुठलाही डाग नाही. ते सफेद म्हणजे सफेद आहेत. एकही डाग नाही. हे सांभाळणं खूप कठीण असतं. तुम्ही मुख्यमंत्रीपद भूषविल्यानंतरही तुमच्याकडे कोणी बोट दाखवू शकत नाही. यापेक्षा आणखी काय लागतं? म्हणजे देवेंद्र फडणवीस, अजित पवार हे सुद्धा माझे चांगले मित्र आहेत. पण एकनाथ शिंदे यांना मी खूप आधीपासून ओळखतो. साधे कार्यकर्ते होते तेव्हापासून. त्यांचं सातत्य कमाल आहे. पुन्हा तसंच बोलणं, तसंच राहणं. असे मित्र असणं आनंद आहे”, अशा शब्दांत नाना पाटेकर यांनी एकनाथ शिंदे यांची स्तुती केली.