कोल्हापूरच्या मध्यवर्ती ठिकाणी असणाऱ्या खासबाग मैदान बस स्टॉपवर उभं राहिल्यावर तुमच्या कानावर जर एखाद्या बॉलिवूड अभिनेत्याचा किंवा राजकीय नेत्याचा आवाज कानावर पडला, तर आश्चर्य वाटण्याचं कारण नाही. कारण हा आवाज आहे किशोर साळोखे यांचा, जे आपल्या अफलातून मिमिक्रीने आणि आवाजांनी संपूर्ण कोल्हापूरात प्रसिद्ध झाले आहेत. गेल्या अनेक वर्षांपासून ते खासबाग परिसरातील चहाचा छोटासा व्यवसाय करतात आणि कोल्हापूरकर चहा पित किशोर साळोखे यांच्या कलेचा आस्वाद घेतात.

नाना पाटेकर, मकरंद अनासपुरे, निळू फुले यांसारख्या बॉलिवूडच्या दिग्गज अभिनेत्यांच्या आवाजाची हुबेहूब नक्कल करून ते ग्राहकांना थक्क करतात. एवढंच नाही, तर मुख्यमंत्री देवेंद्र फडणवीस, शिवसेनाप्रमुख बाळासाहेब ठाकरे अशा राजकीय नेत्यांचे आवाज आणि त्यांच्या भाषणांच्या ठेक्याची अचूक नक्कल करून ते उपस्थितांना खळखळून हसवतात. त्यांच्या या कलेमुळे त्यांचा चहाचा स्टॉल हा स्थानिकांसाठी आणि पर्यटकांसाठी एक खास आकर्षण ठरत आहे. कोल्हापूरात चाहावल्यांची काही कमी नाही, पण किशोर साळोखे यांच्या ‘टर्निंग पॉईंट’वर आलेला प्रत्येक ग्राहक हा आनंदी होऊन परत जातो.

किशोर साळुंखे चहावाले कसे बनले?

किशोर साळुंखे यांचा प्रवास अत्यंत खडतर आणि प्रेरणादायी आहे. लहानपणी त्यांनी वडिलांचं छत्र गमावलं, आणि शारीरिक व्याधींमुळे त्यांना अनेक अडचणींचा सामना करावा लागला. सुरुवातीला ते सोनाराचं काम करत होते, पण या कामामुळे त्यांना संधीवाताचा त्रास जाणवू लागला. डॉक्टरांनी त्यांना हे काम बंद करण्याचा आणि दुसरं काहीतरी करण्याचा सल्ला दिला. अशा प्रतिकूल परिस्थितीत किशोर यांनी हार न मानता नव्या मार्गाचा शोध घेतला. त्यांनी चहाचा व्यवसाय सुरू करण्याचा निर्णय घेतला आणि कोल्हापूरच्या छत्रपती शाहू खासबाग मैदान परिसरात ‘मूडचा टर्निंग पॉईंट’ नावाने चहाची गाडी सुरू केली.

या भागात चहाच्या गाड्यांमध्ये तगडी स्पर्धा होती, त्यामुळे किशोर यांनी आपली मिमिक्रीची कला व्यवसायाला जोडून एक अनोखी ओळख निर्माण करण्याचा मार्ग निवडला. किशोरच्या गाडीवर चहा पिणं म्हणजे थिएटरचा आनंद घेण्यासारखं आहे. त्यांच्या मिमिक्रीमुळे दिवसभराचा ताण विसरायला होतो. मात्र यातून किशोर यांची जिद्द आणि हार न मानता आपला व्यवसायाकडे ग्राहक कसे जोडले जातील यासाठी केलेल्या प्रयत्न दिसून येतात.