भिवंडीतील राहनाळ गावात संबंधित घटना घडली आहे. राहनाळ गावात स्वागत कंपाउंडमधील फर्निचरच्या गोदामाला भीषण आग लागली. या आगीत फर्निचरची 10 ते 15 गोदाम जळून खाक झाली आहेत. घटनास्थळी भिवंडी, ठाणे अग्निशमन दलाच्या तीन ते चार गाड्या आगीवर नियंत्रण मिळवण्यासाठी दाखल झाल्या. त्यांच्याकडून आगीवर नियंत्रण मिळवण्याचे प्रयत्न सुरु आहेत. पण अजूनही आग धुमसलेलीच आहे. आग विझवताना अग्निशामक दलाचा जवान जखमी झाल्याती माहिती आता समोर येत आहे. त्यामुळे या आगीची दाहकता किती भयानक असेल याचा अंदाज आपल्याला येईल.

पहाटे चार वाजेच्या सुमारास ही आग लागली होती. या आगीत गोदामातील लाकडी प्लाउड, लाकडं आणि सोल्यूशनचा साठा जळून खाक झाला आहे. चार अग्मिशामक दलाच्या गाड्यांकडून आगीवर नियंत्रण मिळवण्याचे प्रयत्न सुरु आहेत. पण पाण्याच्या कमतरतेमुळे आगीवर नियंत्रण मिळवण्यात अडचणी येत असल्याची माहिती आहे. आगीचे मोठे लोळ बघायला मिळत आहेत. तसेच धुराचे लोळ हे घटनास्थळापासून सुमारे 10 ते 15 किमी अंतरापासून दिसत आहेत. धुरामुळे स्थानिक नागरिकांना देखील आता त्रास होत असल्याची माहिती मिळत आहे.

या अग्नितांडवामुळे चार मजली इमारत कोसळल्याची माहिती स्थानिकांनी दिली. या दुर्घटनेत अद्याप कोणतीही जीवितहानी झाल्याचे समोर आलेली नाही. ही आग नेमकी कशामुळे लागली याची माहिती अद्याप समजू शकलेली नाही. या प्रकरणी आगामी काळात तपास केला जाण्याची शक्यता आहे. पण या आगीत मोठी वित्त हानी झाली आहे.