नगरविकास विभागाचे अवर सचिव यांनी याबाबतचे पत्र महापालिकेसह संबंधित यंत्रणांना पाठविले आहे. त्यामुळे नाशिकमध्ये नियमित मेट्रो होण्याबाबतच्या आशा पल्लवित झाल्या आहेत. मेट्रो शहरामध्ये सार्वजनिक वाहतूक व्यवस्था बळकट व्हावी या उद्देशाने केंद्र सरकारने सर्व महापालिकांना स्वतंत्रपणे वाहतूक आराखडा तयार करण्याच्या सूचना दिल्या आहेत.

Mumbai Metro: मान्सूनमध्ये सुरु राहणार मुंबईतील चारही मेट्रो सेवा, पाच गाड्या राखीव ठेवणार; बिघाड टाळण्यासाठी उपाययोजना

आठ वर्षांपासून मेट्रो रखडली

नाशिक महापालिकेचा पहिला सर्वंकष वाहतूक आराखडा सन २०१६ मध्ये तयार करण्यात आला. त्यावेळी पादचारी मार्ग, सायकल ट्रॅक, रस्ता विकास, मालवाहतूक, तंत्रज्ञान व रहदारी अभियांत्रिकी धोरणाचा समावेश करीत ‘अर्बन मास ट्रान्झिट’ या दिल्ली (युएमटीसी) स्थित कंपनीने सर्वंकष वाहतूक आराखडा तयार केला होता. त्यातूनच शहरात सिटीलिंक कंपनीची बस सेवा सुरू झाली. त्या आराखड्याचाच आधार घेऊन पुढे नाशिकसाठी ‘टायरबेस्ड मेट्रो निओ’ची घोषणा करण्यात आली होती. त्यासाठी २,१०० कोटींचा निधीही मंजूर करण्यात आला होता. परंतु, गेल्या आठ वर्षांपासून ही मेट्रो प्रत्यक्षात आली नसल्याने आता नियमित मेट्रोचा विचार सुरू झाला आहे.

‘महाराष्ट्र रेल्वे कॉर्पोरेशन टायरबेस मेट्रो’ऐवजी नियमित मेट्रोच्या अनुषंगाने नाशिक शहराचा वाहतूक आराखडा तयार करण्याच्या सूचनाही संबंधित अधिकाऱ्यांना देण्यात आल्या होत्या. त्यानुसार सदरचा नाशिक शहराचा आराखडा ‘महाराष्ट्र मेट्रो रेल कॉर्पोरेशन लिमिटेड’ या संस्थेकडे सादर करण्यात आला. यानुसार आता ‘टायरबेस्ड मेट्रो’ऐवजी मुंबई, पुणे, नागपूरच्या पारंपरिक मेट्रोसाठीची चाचपणी नाशिक शहरात सुरू करण्यात आली आहे.

Mumbai News: नव्या पुलावर निकृष्ट दर्जाचे काँक्रीट, खडी व माती पसरलेली, पण महापालिकेकडून भलतंच उत्तर, मृणालताई गोरे पूल चर्चेत

…यांची असणार उपस्थिती

नियमित मेट्रोसाठी नगरविकास विभागाचे अवर सचिव अजयसिंग पाटील यांनी आज, बुधवारी होणाऱ्या बैठकीसाठी विभागीय आयुक्त डॉ. प्रवीण गेडाम, कुंभमेळा आयुक्त शेखर सिंह, महापालिका आयुक्त मनीषा खत्री, महाराष्ट्र मेट्रो रेल कार्पोरेशनचे ‘एमडी’ यांना ऑनलाइन पद्धतीने उपस्थित राहण्याचे निर्देश दिले आहेत. या बैठकीत नियमित मेट्रो प्रकल्पाबाबत विचार केला जाणार असून, त्यासाठी आवश्यक ती माहिती उपलब्ध ठेवण्याचे निर्देश देण्यात आले. गत आठ वर्षांपासून नाशिककरांना ‘टायरबेस्ड मेट्रो निओ’च्या आशा दाखविण्यात आल्या होत्या. त्यात आता ‘नियमित मेट्रो’ची चाचपणी सुरू झाल्याने नाशिककरांच्या वाट्याला नेमकी कोणती मेट्रो येणार, असा प्रश्न उपस्थित होत आहे.

अशी आहे मेट्रोसाठी अट

मेट्रोसाठी तासाला २० हजार प्रवासी मिळणे अपेक्षित आहे. परंतु, नाशिकमध्ये प्रतितास चौदा हजार प्रवासी मिळत असल्याने ‘टायरबेस्ड मेट्रो’चा पर्याय निवडण्यात आला. परंतु, ‘निओ मेट्रो’ला उशीर झाल्यानंतर ‘टायरबेस्ड मेट्रो’ऐवजी नियमित मेट्रोसाठी पावले उचलण्यात आली आहेत. त्यासाठी ‘महामेट्रो’ने नाशिकचा वाहतूक आराखडा तयार केला असून, त्यात नाशिकमध्ये प्रतितास २० हजार प्रवासी असल्याचा दावा करण्यात आला आहे. त्यामुळे हा आराखडा आता नगरविकास मंत्रालयात सादर केला असून, त्यानुसार नियमित मेट्रोची चाचपणी सुरू करण्यात आली आहे.