Child Marriage in Baramati : बारामती तालुक्यातील माळेगाव खुर्द येथे पोलिसांनी एका बालविवाह रोखला. तेरा वर्षीय मुलीचा विवाह लावण्याचा प्रयत्न करत असताना पोलिसांनी नववधू आणि नवरदेवाच्या आई-वडिलांसह पाच जणांवर गुन्हा दाखल केला आहे. ग्रामपंचायतची परवानगी न घेता विवाह आयोजित करण्यात आला होता. सहाय्यक निरीक्षक सचिन लोखंडे यांना माहिती मिळाल्यानंतर त्यांनी तात्काळ कारवाई केली.
माळेगाव पोलीस ठाण्याचे सहाय्यक निरीक्षक सचिन लोखंडे यांना वधू अल्पवयीन असून होणारा विवाह सोहळा हा बालविवाह सोहळा असल्याची माहिती मिळाली. त्यावरून त्यांनी त्यांचे पोलीस पथक या ठिकाणी पाठवले, खातर जमा केल्यानंतर मुलगी तेरा वर्षे आठ महिने वयाची निघाली. त्यामुळे वधू वर पक्षांना घेऊन पोलिसांचे पथक माळेगाव पोलीस ठाण्यात पोचले.
या ठिकाणी रितसर चौकशी करून पोलिसांनी पाच जणांवर बालविवाह प्रतिबंधक कायद्यानुसार गुन्हा दाखल केला. याप्रकरणी माळेगावचे ग्रामसेवक इम्तियाज इनामदार यांनी फिर्यादी दिली. त्यावरून माळेगाव पोलिसांनी भारतीय न्याय संहिता 2023 चे कलम 3 (5) सह बालविवाह प्रतिबंधक कायदा 2006 चे कलम 9, 10 प्रमाणे नवरी मुलीचे वडील राजेश अजगर भोसले, नवरीची आई सौ.वारणा राजेश भोसले (दोघेही रा.माळेगाव खुर्द ता.बारामती जि.पुणे), नवरदेव राहुल भानुदास शिंदे, नवरदेवाचे वडील भानुदास मायाजी शिंदे व नवरदेवाची आई रुपाली भानुदास शिंदे (सर्व रा. पिपरी ता. खंडाळा जि. सातारा) या पाच जणांविरोधात गुन्हा दाखल केला आहे.