नेमकं प्रकरण काय?

मिळालेल्या माहितीनुसार, १७ वर्षीय मुलाचे एका २१ वर्षीय तरुणीसोबत प्रेमसंबंध असल्याचे समोर आले आहे. या तरुणीने अल्पवयीन मुलाला लग्नाचे आमिष दाखवून त्याला तळेगाव दाभाडे परिसरातील एका कॅफेमध्ये नेले. कॅफेमध्ये असताना तरुणीने अल्पवयीन मुलाचे चुंबन घेतल्याचे तक्रारीत नमूद करण्यात आले आहे.

अल्पवयीन मुलाची पोलीस ठाण्यात तक्रार

दरम्यान, हा प्रकार अल्पवयीन मुलाच्या वडिलांना समजल्यानंतर त्यांनी तातडीनेतळेगाव दाभाडे पोलीस ठाणे गाठले. त्यांनी पोलिसांकडे तक्रार दाखल करत, संबंधित तरुणीने आपल्या मुलाला लग्नाचे आमिष दाखवले आणि शारीरिक संबंध ठेवण्याच्या हेतूने त्याचे चुंबन घेतल्याचा गंभीर आरोप केला आहे.

तरुणीविरोधात पॉक्सो अंतर्गत गुन्हा दाखल

वडिलांच्या तक्रारीनंतर पोलिसांनी या प्रकरणाची दखल घेत संबंधित २१ वर्षीय तरुणीविरोधात भारतीय न्याय संहिता कलम १३७(२) तसेच पॉक्सो कायद्यातील कलम ८ आणि १२ अंतर्गत गुन्हा दाखल केला आहे. या प्रकरणाचा पुढील तपास तळेगाव दाभाडे पोलीस करत आहेत.

या घटनेमुळे अल्पवयीन मुलांशी संबंधित प्रेमसंबंध आणि त्यातून निर्माण होणाऱ्या कायदेशीर गुंतागुंतीचा मुद्दा पुन्हा ऐरणीवर आला आहे. मुलगा आणि तरुणी यांच्यात परस्पर संमती असल्याचा दावा असला तरी, अल्पवयीन व्यक्तीच्या बाबतीत पॉक्सो कायद्यातील तरतुदी लागू होऊ शकतात. त्यामुळे अशा प्रकरणांमध्ये कायद्याची भूमिका अत्यंत महत्त्वाची ठरते.

या प्रकरणात तक्रारीतील आरोप, पोलिसांनी दाखल केलेला गुन्हा आणि तपासातून समोर येणारे तथ्य यावरच पुढील कायदेशीर कारवाई अवलंबून असणार आहे.