Wadala News : मुंबईतील वडाळ्यात राम नवमी निमित्त विश्व हिंदू परिषदेने आयोजित केलेल्या रॅलीला पोलिसांनी सुरुवातीला परवानगी नाकारली. तरीही विश्व हिंदू परिषदेकडून रॅली काढण्यात आली. त्यावर पोलिसांनी आक्षेप घेतला. पोलिसांनी रॅलीला अडवल्यानंतर पोलीस आणि कार्यकर्ते आमनेसामने आले . अखेर, कार्यकर्त्यांच्या तीव्र भूमिकेनंतर पोलिसांनी शोभायात्रेला परवानगी दिली आहे.
विश्व हिंदू परिषदेकडून राम नवनीच्या निमित्ताने शोभायात्रेचं आयोजन करण्यात आलं आहे. या शोभायात्रेसाठी पोलिसांकडे रितसर परवानगी मागण्यात आली होती. पण पोलिसांनी या शोभायात्रेच्या मार्गावरुन परवानगी नाकारली. तरीही विश्व हिंदू परिषदेसह इतर हिंदुत्ववादी संघटनांकडून शोभायात्रेची जय्यत तयारी करण्यात आली. कार्यकर्त्यांकडून शोभायात्रेसाठी ठिकठिकाणी पोस्टबाजी करण्यात आली होती. कार्यकर्त्यांमध्ये शोभायात्रेचा जोश होता. पण पोलिसांनी परवानगी नाकरली होती. तरीही कार्यकर्त्यांनी रॅलीसाठी तयारी केली. यामुळे पोलीस तिथे दाखल झाले.
वडाळा पोलीस ठाण्याबाहेर तरुणांची गर्दी
पोलिसांनी विश्व हिंदू परिषदेच्या कार्यकर्त्यांना रोखलं. यावेळी कार्यकर्ते आणि पोलिसांमध्ये मोठा राडा झाला. पोलिसांनी काही आंदोलकांना ताब्यात घेतलं. तर पोलिसांकडून यावेळी लाठीचार्ज करण्यात आल्याचा आरोप विश्व हिंदू परिषदेच्या कार्यकर्त्यांकडून केला जातोय. या कार्यकर्त्यांनी माध्यमांनादेखील प्रतिक्रिया देताना पोलिसांवर आरोप केले आहेत. या घटनेनंतर विश्व हिंदू परिषदेसह विविध हिंदुत्ववादी संघटनेचे कार्यकर्ते वडाळा पोलीस ठाण्याबाहेर एकत्र जमले. या कार्यकर्त्यांकडून जोरदार घोषणाबाजी करण्यात आली. आंदोलकांकडून जय श्रीरामच्या घोषणा देण्यात आल्या.
यावेळी आंदोलकांना समजावण्यासाठी मंत्री मंगलप्रभात लोढा येणार असल्याची माहिती समोर आली. तसेच अनेक वरिष्ठ पोलीस अधिकारी आंदोलकांना समजावण्यासाठी येणार असल्याची माहिती समोर आली. यानंतर पोलिसांनी तरुणांना शांततेचं आवाहन केलं. तरुण देखील शांत झाले. यानंतर पोलिसांकडून शोभायात्रेसाठी परवानगी देण्यात आल्याची माहिती समोर येत आहे.
लेखकाबद्दलचेतन पाटीलचेतन पाटील हे सध्या महाराष्ट्र टाइम्स ऑनलाईन टीममध्ये डिजीटल कंटेंट प्रोड्यूसर म्हणून कार्यरत आहेत. चेतन यांनी याआधी tv9 मराठी, News18 लोकमत, आपलं महानगर येथे काम केलं आहे.… आणखी वाचा