रोजगार हमी योजना मंत्री भरत गोगावले हे शनिवारी सोलापूर दौऱ्यावर आले आले होते. अक्कलकोटला स्वामी समर्थांचे दर्शन घेऊन ते सोलापुरात आले होते. गोगावले यांनी दुपारी साडेबाराच्या सुमारास शिवसेनेचे जिल्हाप्रमुख मनीष काळजे यांच्या सात रस्ता येथील कार्यालयास भेट दिली. त्याच ठिकाणी गोगावले यांनी पत्रकार परिषद घेतली. सदर पत्रकार परिषद ही जास्त वेळ सुरू असल्याने पुढील नियोजित कार्यक्रमास विलंब होत होता.

दुसरीकडे माजी नगरसेवक मनोज शेजवाल, अमोल शिंद, उमेश गायकवाड यांच्यासह इतर पदाधिकारी शासकीय विश्रामगृहात मंत्री भरत गोगावले यांची वाट पाहात बसले होते. इतर पदाधिकारी हे शासकीय विश्रामगृहात मंत्री गोगावले यांची वाट पाहत थांबले होते. त्यावेळी माजी शहराध्यक्ष मनोज शेजवाल हे गोगावले अजून कसे येत नाहीत, याची माहिती घेण्यासाठी मनीष काळजे यांच्या कार्यालयाकडे आले होते. त्याठिकाणी गेल्यानंतर त्यांनी एवढा वेळ का होतोय? अशी मनोज शेजवाल यांनी विचारणा केली. त्यावर मनीष काळजे यांनी वेळेनुसार दौरा सुरू असल्याचे सांगताच मनोज शेजवाल आणि मनीष काळजे यांच्यात जोरदार राडा झाला.

हा राडा मंत्री भरत गोगावले यांच्यासमोर झाला. शेजवाल आणि काळजे यांच्यात झालेला राडा पाहून मंत्री गोगावले यांच्यासह उपस्थित असणाऱ्यांना आश्चर्याचा मोठा धक्का बसला. सरतेशेवटी भरत गोगावले यांनीच तडजोड करत दोघांना बाजूला केले. त्यानंतरही हे दोघे एकमेकांवर चिखलफेक करीत राहिले. मनोज शेजवाल आणि मनीष काळजे यांच्यातील वाद मिटवून मंत्री गोगावले हे सोलापूरच्या शासकीय विश्रामगृहात पोहोचले होते. त्या ठिकाणी शिवसेनेचे वरिष्ठ कार्यकर्ते, युवासेना, महिला आघाडीच्या पदाधिकारी आणि कार्यकर्ते यांना भेटून त्यांच्याशी संवाद साधून पुढे निघून गेले.