जुन्या वाहन खरेदी-विक्रीचे मोठे ‘मार्केट’ आहे. शहराच्या वेगवेगळ्या भागात जुनी वाहने खरेदी-विक्री करणारे छोटे-मोठे विक्रेते आहेत. याशिवाय राज्यभरातून नागरिक पुण्यात जुन्या वाहनांच्या खरेदीसाठी येतात. जुन्या वाहनांची खरेदी-विक्री लाखांच्या घरात आहे. या व्यवहारात फसवणुकीचे प्रकार घडल्याचेही उघडकीस आले आहे. शहरातील नागरिकांनी त्यांची वाहने जुन्या वाहनांची खरेदी-विक्री करणाऱ्या डीलरकडे दिली, तरी ते वाहन लगेचच ग्राहकाच्या नावे करण्यात येत नाही. दुसरीकडे, त्या डीलरकडून ते वाहन कोणी खरेदी केले, तर त्या खरेदीदाराच्या नावावर ते वाहन केले जाते. यामध्ये अनेकदा वेळ जातो आणि दरम्यानच्या काळात त्या वाहनाचा गैरवापर होण्याचे प्रकार नाकारता येत नाहीत. अनेक वेळा या व्यवहारांमध्ये फसवणूक झाल्याचेही निदर्शनास आले आहे. त्यामुळे केंद्र सरकारने जुन्या वाहनांची खरेदी-विक्री करणाऱ्या व्यावसायिकांना परवाना देण्याचा धोरण तयार केले आहे. या धोरणाची अंमलबजावणी करण्यात येत नव्हती.

जुन्या वाहनांची खरेदी-विक्री करणाऱ्या व्यावसायिकांनी पुणे ‘आरटीओ’कडे ‘२९ अ’नुसार अर्ज केल्यानंतर ‘आरटीओ’कडून अधिकृत विक्रीचे प्रमाणपत्र दिले जाईल. त्यामुळे नागरिकांनी या वाहन विक्रेत्यांना वाहनाची विक्री केल्यानंतर ते वाहन विक्रेत्यांना त्यांच्या नावावर करता येणार आहे. त्या वाहनाची त्यांनी विक्री केल्यानंतर ते दुसऱ्या व्यक्तीच्या नावावर करून देणे सोपे होणार आहे; तसेच चोरीची वाहने, नागरिकांची होणारी फसवणूक टाळण्यास मदत होणार आहे. याचा फायदा जुने वाहनांची खरेदी-विक्री करणाऱ्यांनाही होणार आहे.

• जुन्या वाहनांच्या खरेदी-विक्रीमध्ये पारदर्शकता येईल. पुनर्विक्रीसाठी येणाऱ्या प्रत्येक नोंदणीकृत वाहनाची माहिती ‘आरटीओ’ला मिळेल.
• डीलरना वाहननोंदणी, फिटनेस प्रमाणपत्र, ‘एनओसी’ आणि ताब्यात असलेल्या वाहनांच्या हस्तांतरासाठी थेट अर्ज करण्याचा अधिकार मिळेल.
• डीलरला प्रथम त्यांच्या नावावर जुन्या वाहनाची ‘ऑनलाइन’ नोंदणी करावी लागेल. त्यानंतरच तो त्याची विक्री करू शकेल. अशा स्थितीत वाहन विकल्यानंतर मालकावर कोणतीही जबाबदारी राहणार नाही.

‘डीलर’च्या नावे वाहन होणार?

जुन्या वाहनांची खरेदी-विक्री करणाऱ्या व्यावसायिकांना अधिकृत परवाना देण्याचा निर्णय घेतल्यानुसार, ‘आरटीओ’कडे अर्ज केल्यानंतर कायदेशीर प्रक्रिया पार पाडून या वाहन खरेदी-विक्रीचा अधिकृत परवाना देण्यात येणार आहे.

पुण्यात जुन्या वाहनांची खरेदी-विक्री करणाऱ्यांची संख्या मोठी आहे. त्यामुळे या वाहनांची विक्री करणारी बरीच केंद्रे आहेत. जुन्या वाहन खरेदी-विक्रीतील फसवणूक व पुढे येणाऱ्या अडचणी टाळण्यासाठी जुन्या वाहन खरेदी-विक्री डीलरना अधिकृत परवाना देण्याचा निर्णय घेण्यात आला आहे. त्याचा नागरिकांना फायदा होणार असल्याचं पुणे उपप्रादेशिक परिवहन अधिकारी स्वप्नील भोसले यांनी सांगितलं.