Mumbai Hotel Tukaram Mundhe Action : अन्न व औषध प्रशासनाच्या आयुक्त पदावर बसल्यानंतर तुकाराम मुंढेंनी राज्यात कारावाईचा धडाका सुरु केला आहे. आता त्यांनी मुंबईतील प्रसिद्ध हॉटेल्सवर कारवाया केल्या आहेत.
‘ईट निनो’ या हॉटेलच्या तपासणीमध्ये कीटकांचा वावर
मुंबईतील दहा हॉटेल्स, रेस्टॉरंट्स आणि कॅन्टीनची तपासणी करण्यात आली. त्यापैकी चार आस्थापनांचे एफएसएसएआय परवाने निलंबित केले. पाच आस्थापनांना व्यवसाय बंदची नोटीस बजावली, तर एका आस्थापनाला सुधारणा नोटीस देण्यात आली. दादर पश्चिमेकडील ‘ईट निनो’ या हॉटेलच्या तपासणीमध्ये कीटकांचा वावर, अन्न हाताळणाऱ्या कर्मचाऱ्यांच्या वैयक्तिक स्वच्छतेचा अभाव, स्वच्छता व निर्जंतुकीकरणाचा अभाव, अन्नाची आणि पिण्याच्या पाण्याची अनिवार्य चाचणी केल्याच्या नोंदी नसणे अशी विविध उल्लंघने आढळली. अंधेरी पश्चिमेकडील ‘जय माँ काली धाबा’च्या तपासणीमध्ये खराब अवस्थेत असलेल्या प्लायवूड रॅकचा वापर, शौचालयाच्या बाजूला अन्नाची साठवणूक केल्याचे आढळले.
Tukaram Mundhe : तलवारीने डास मारल्यासारखं करु नका, हायकोर्टाच्या FDA ला कानपिचक्या; आधी प्रशंसा केलेय, पण कायदेशीर प्रक्रियेचं काय?
तपासणीदरम्यान स्वयंपाकघरात झुरळे
सांताक्रूझ पश्चिमेकडील ‘हाऊस ऑफ महाराष्ट्र’या रेस्टॉरंटच्या स्वयंपाकघरात झुरळे आढळली. कुर्ला पश्चिमेकडील ‘साऊथ इंडिया डोसा कॉर्नर’मध्ये कचरा व सांडपाण्याची योग्य विल्हेवाट लावण्याची व्यवस्था नसल्याचे आढळले. परिणामी, या हॉटेल्सचे परवाने निलंबित करण्यात आले. प्रभादेवी येथील ‘मारूश हॉटेल’, वांद्रे पश्चिमेकडील ‘छत्रधार कॅटरर्स’ आणि शिवाजी नगर येथील ‘विजयदीप महिला औद्योगिक उत्पादक सहकारी संस्था’ यांना व्यवसाय बंद करण्याचे निर्देश देण्यात आले. तर ‘अन्नपूर्णा कॅटरिंग सर्व्हिस’ला सुधारणा नोटीस बजावण्यात आली. नवी मुंबईतील ‘पंजाब ग्रिल’ येथे तपासणीदरम्यान स्वयंपाकघरात झुरळे, अस्वच्छता आढळल्याने एफएसएसएआय परवाना निलंबित करण्यात आला.
अमरावती, नागपूरमध्येही छापे
अमरावतीतील ‘हॉटेल रोशनी’ आणि ‘रोशनी स्वीट मार्ट’ तसेच नागपूरमधील ‘द हंग्री पांडा किचन’ यांच्याकडूनही स्वच्छता आणि अन्नसुरक्षा नियमांचे गंभीर उल्लंघन झाल्याचे आढळले. त्यामुळे या आस्थापनांचे परवाने निलंबित करण्यात आले.