इगतपुरीच्या घोटीतील खासगी शाळेत हा धक्कादायक प्रकार समोर आला आहे. आठवी आणि नऊवीच्या विद्यार्थ्यांच्या दप्तरात फायटर, चाकू, पत्त्यांची कॅट, कंडोम, सायकलची चेन सापडली आहे. शिक्षकांच्या जागरुकतेने हा प्रकार उघडकीस आला आहे. शिक्षकांनी विद्यार्थ्यांचं दप्तर तपासल्यावर या गोष्टी समोर आल्या आहेत. यानंतर पालकांना बोलावून विद्यार्थ्यांना समज देण्यात आली आहे. विशेष म्हणजे याआधीदेखील चित्र-विचित्र हेअरस्टाईल करणाऱ्या विद्यार्थ्यांना शिक्षकांकडून दणका देण्यात आला होता. हेअरस्टाईल करुन हिरोगिरी करणाऱ्या विद्यार्थ्यांचे शाळेत केसही कापण्यात आले होते. यानंतर आता विद्यार्थ्यांच्या दफ्तरात धक्कादायक वस्तू आढळल्या आहेत. त्यामुळे शिक्षकही चक्रावले आहेत.

शिक्षक आणि पालकांची प्रतिक्रिया काय?

ही घटना समोर आल्यानंतर संबंधित शाळेच्या शिक्षकांनी प्रतिक्रिया दिली आहे. “विद्यार्थ्यांच्या दप्तरात आम्हाला काही लोखंडी वस्तू सापडल्या आहेत. चाकू, सुरु देखील सापडल्या आहेत. पत्त्यांच्या कॅट सापडल्या आहेत. त्या वस्तू ज्यांच्याकडे सापडल्या आहेत त्यांचं आम्ही समूपदेशन केलं आहे. त्यांच्या पालकांना सांगितलं आहे. विद्यार्थ्यांना आम्ही सांगितलं आहे की, हे बरोबर नाही. या वस्तू कुख्यात गुंडांकडे असतात. त्यामुळे हे असं करणं चालणार नाही. असं करु नकोस, आम्ही विद्यार्थ्यांना सांगत असतो”, अशी प्रतिक्रिया शाळेच्या शिक्षकांनी दिली. दरम्यान, “शाळेचे उपमुख्यध्यापक यांनी उपक्रम केला की, मुलांची कटिंग वगैरे, खरंतर या गोष्टी पालकांनी केलं पाहिजे. सरांचा उपक्रम छान होता”, अशी प्रतिक्रिया एका शिक्षिकेने दिली.

“इगतपुरी तालुक्यातील एका माध्यमिक शाळेत शिक्षकांनी विद्यार्थ्यांच्या बॅग तपासल्या. त्या बॅग्समध्ये काही आक्षेपार्ह गोष्टी आढळल्या. नक्कीच ही खेदजनक बाब आहे. मी शाळेच्या शिक्षकांचं आणि शिक्षकांचं अभिनंदन करतो. फक्त अध्यापनच नाही तर शाळेच्या विद्यार्थ्यांना शिस्त लावण्याचं काम त्यांनी केलेलं आहे. मी पालकांना सुधा आवाहन करतो, शिक्षकांकडे विद्यार्थी आठ तास असतो. पण पालकांनी सुद्धा विद्यार्थ्यांच्या बॅग नियमितपणे तपासायला हव्यात”, असं आवाहन गट शिक्षणाधिकारी निलेश पाटील यांनी केलं आहे.