भाऊ आणि मित्रांसोबत पानशेत परिसरात फिरायला गेला होता मोहनीस

याप्रकरणी मिळालेल्या प्राप्त माहितीनुसार, मोहनीस बोलाटे हा आपला भाऊ शुभम आणि काही मित्रांसह रविवारी सुट्टी असल्याने पानशेत धरण परिसरात पर्यटनासाठी गेला होता. यावेळी काही मित्र धरणाच्या काठावर बसून गाणी ऐकत आणि गप्पा मारत होते, तर काहीजण पाणलोट क्षेत्रात उतरून पर्यटनाचा आनंद घेत होते. यावेळी मोहनीस आणि त्याचा मित्र ज्ञानेश्वर सोनटक्के यांनी पोहण्यासाठी धरणाच्या पाण्यात उतरण्याचा निर्णय घेतला. दोघेही पाण्यात उतरून पोहू लागले. मात्र, काही वेळातच मोहनीस अचानक दिसेनासा झाला. ही बाब ज्ञानेश्वरच्या लक्षात येताच त्याने आरडाओरडा सुरू केला, परंतु तोपर्यंत खूप उशीर झाला होता.
Pune News: तुमची ऐपत नसेल तर ससूनमध्ये जा; वहिनीचं बीपी वाढलं अन्… दीनानाथमध्ये नेमकं काय घडलं?

मोहनीस दिसेनासा झाला, दीड तासांनी सापडला पण तोपर्यंत खूप उशीर झालेला

मोहनीस पाण्यात बुडाल्याचे समजताच शुभम आणि इतर मित्रांनी तातडीने पोलिसांना याबाबतची माहिती दिली. पोलिसांनी घटनास्थळी धाव घेऊन आपत्ती व्यवस्थापन टीमच्या मदतीने खोल पाण्यात शोधकार्य सुरू केले. सुमारे दीड तासांच्या अथक प्रयत्नांनंतर मोहनीसचा मृतदेह पाण्यातून बाहेर काढण्यात आला. त्याला तात्काळ वेल्हे येथील ग्रामीण रुग्णालयात नेण्यात आले, परंतु डॉक्टरांनी त्याला मृत घोषित केले.

पानशेत धरण परिसरातील सुरक्षिततेचा प्रश्न पुन्हा ऐरणीवर

या प्रकरणी पोलिसांनी आकस्मित मृत्यूची नोंद केली असून, पुढील तपास सुरू आहे. ही घटना पर्यटकांसाठी लोकप्रिय असलेल्या पानशेत धरण परिसरात घडल्याने सुरक्षिततेचा प्रश्न पुन्हा एकदा ऐरणीवर आला आहे. स्थानिक प्रशासनाने या परिसरात पोहण्यासाठी उतरणाऱ्या पर्यटकांसाठी कडक नियम लागू करण्याची गरज आहे.