HSRP Number Plate Marathi News : राज्यातील ग्रामीण भागात उच्च सुरक्षा नंबरप्लेट बसवताना लूटमार सुरू आहे. नागरिकांना एक हजार ते दोन हजार रुपये खर्च येतो. ४० ते ५० किलोमीटर प्रवास करावा लागतो. ऑनलाईन अर्ज करण्यासाठी एजंटांमार्फत जास्त पैसे उकळले जात आहेत. फिटमेंट सेंटरच्या अडचणींमुळे मनस्ताप होत आहे. बऱ्याच वाहनांनी अद्याप सुरक्षा नंबरप्लेट बसविलेली नाही.
परिवहन विभागाने १ एप्रिल २०१९ पूर्वीची नोंदणी असलेल्या वाहनांना सुरक्षा नंबरप्लेट ३० जूनपर्यंत बसविणे अनिवार्य केले आहे. राज्यात साधारणपणे एक कोटीपेक्षा जास्त वाहनांना सुरक्षा नंबरप्लेट बसवावी लागणार आहे. त्यासाठी परिवहन विभागाने तीन झोन तयार करून तीन कंपन्यांना हे काम दिले आहे. झोन एकमध्ये १२, झोन दोनमध्ये १६ आणि झोन तीनमध्ये २७ आरटीओ कार्यालये आहेत. तीन झोनसाठी तीन वेगवेगळ्या कंपन्यांना सुरक्षा नंबरप्लेट बसविण्याचे काम दिले आहे; पण त्यांची ‘फिटमेंट सेंटर’देखील पुरेशी नाहीत.
सुरक्षा नंबरप्लेट बसविण्यासाठी जाणाऱ्या नागरिकांची लूटमार सुरू आहे. ग्रामीण भागात अनेक नागरिकांना ऑनलाईन अर्ज करण्याची माहिती नाही; त्यामुळे अर्ज करण्यासाठी १०० ते २०० रुपये लागतात. हे काम एजंटमार्फतच केले जात असल्यामुळे ते जास्त पैसे उकळतात. ‘ब्रॅकेट’च्या नावाखालीही जादा पैसे उकळले जात आहेत. ग्रामीण भागात कंपन्यांनी जिल्ह्याच्या ठिकाणीच ‘फिटमेंट सेंटर’ ठेवल्यामुळे नागरिकांना ४० ते ५० किलोमीटर जावे लागते. प्रत्येक तालुक्यात दोन ते तीन ठिकाणी ही सेंटर सुरू करणे गरजेचे असूनही कंपन्यांकडून त्याकडे दुर्लक्ष केले जात आहे.
नंबरप्लेटचा गोंधळ सुरू
पुण्यासह राज्यातील इतर शहरांमध्ये सुरक्षा नंबरप्लेट बसविण्यामध्ये गोंधळ सुरू आहे. फिटमेंट सेंटर अचानक बंद होणे, तारीख दिलेल्या दिवशी नंबरप्लेट न येणे, नंबरप्लेट नोंदणीसाठीची वेबसाइट बंद पडणे, असे प्रकार सुरू असल्याने अनेकांना मनस्ताप होत आहे. ३० जूनची मुदत दिलेली असताना दहा टक्के वाहनांनाही अद्याप सुरक्षा नंबरप्लेट बसविलेली नाही.
लेखकाबद्दलश्रीकृष्ण कोल्हेश्रीकृष्ण कोल्हे हे महाराष्ट्र टाइम्स, पुणे आवृत्तीमध्ये सिनिअर करस्पॉडंट म्हणून कार्यरत आहेत. पत्रकारितेत १५ वर्षाचा अनुभव. गुन्हेगारी, न्यायालय, वाहतूक आदी विषयावर लिखाण करतात.… आणखी वाचा