हे सारं तब्बल ३ तास चाललं आणि ३ तास तनिषा या प्रसूतीकळा सोसत होत्या, त्यांचं बीपीही वाढलं होतं. त्यानंतर त्यांना दुसऱ्या रुग्णालयात नेण्यात आलं. मात्र, तिथे प्रसूतीदरम्यान त्यांनी दोन चिमुरड्यांना जन्म दिल्यावर प्राण सोडले. या घटनेने संपूर्ण पुण्यात एकच संतापाची लाट उसळली आहे. जर, तनिषा यांना वेळीच उपचार मिळाले असते तर कदाचित त्या वाचल्या असत्या. पण, रुग्णालय प्रशासनाच्या मुजोरीमुळे तनिषा यांचा जीव गेल्याचा आरोप होत आहे. या घटनेमुळे खरंच माणुसकी जिवंत राहिली आहे का, हा प्रश्न आता पुणेकर विचारत आहेत.
Pune News: तुमची ऐपत नसेल तर ससूनमध्ये जा; वहिनीचं बीपी वाढलं अन्… दीनानाथमध्ये नेमकं काय घडलं?

आठ वर्षांपूर्वी तनिषा-सुशांतचा विवाह

सुशांत भिसे आणि तनिषा भिसे यांनी प्रेमविवाह केला होता. हे दोघेही कर्वेनगर मधील रहिवासी आहेत. दोघांची ओळख मित्र- मैत्रिणींच्या माध्यमातून झाली होती. या दोघांचा आठ वर्षांपूर्वी विवाह झाला होता. सुशांत भिसे यांची परिस्थिती थोडी हालाखीची होती. मात्र, तनिषा भिसे यांनी कधीच त्यांची साथ सोडली नाही.

तनिषा या पूर्वी शिक्षिका म्हणून देखील काम करत होत्या. मात्र, लग्न बंधनात अडकल्यानंतर काही वर्षांनी त्यांनी काम सोडून दिलं. यानंतर तनिषा यांनी वेळोवेळी सुशांत यांना त्यांच्या कामासाठी प्रोत्साहित करण्याचे काम केलं. त्यासोबतच घर सांभाळणं, परिसंवाद ठेवणे हे सगळं योग्यरितीने सुशांत यांच्या पत्नी करत होत्या.

यादरम्यान, सुशांत यांना प्रशासकीय विभागामध्ये नोकरी मिळाली. प्रशासकीय विभागामध्ये नोकरी मिळाल्यानंतर अगदी योग्यरितीने त्यांच्या सुखी संसाराचा गाडा सुरू होता. दरम्यान, सुशांत भिसे यांनी अनेक सामाजिक उपक्रमांमध्ये देखील सक्रियपणे सहभाग घेतला. परिसरातील रुग्णांच्या सेवेसाठी सुशांत यांना आरोग्यदूत हा पुरस्कार देखील मिळालेला आहे.

आठ वर्षांनी पहिल्यांदा घरात पाळणा हलणार होता

त्यानंतर तब्बल आठ वर्षानंतर पहिल्यांदाच त्यांच्या घरी नवीन पाहुण्याचं आगमन होणार होतं. आठ वर्षांनी त्यांच्या आयुष्यात त्यांना कोणी आई-बाबा म्हणणारे येणार होते. म्हणून ते दोघेही खूप खुश होते. त्यातच तनिषा या एक नाही तर दोन बाळांना जन्म देणार होत्या, त्यामुळे त्यांचा आनंद द्विगुणीत झाला होता.