Pune Political News: अनिकेत जावळकर यांच्या वाढदिवसानिमित्त वारजेच्या आंबेडकर चौकात काही बॅनर लावण्यात आले आहेत. अनिकेत जावळकरची दीड वर्षांपूर्वी शिंदे गटातून हकालपट्टी करण्यात आली होती. दरम्यान, पक्षात नसतानाही अनिकेत जावळकरने आपल्या वाढदिवसानिमित्त उपमुख्यमंत्री एकनाथ शिंदे आणि खासदार श्रीकांत शिंदे यांच्या फोटोसह बॅनर लावले आहेत.
पक्षातून हकालपट्टी का झाली होती?
उपमुख्यमंत्री एकनाथ शिंदे(Eknath Shinde) यांचे पुत्र, खासदार श्रीकांत शिंदे(Shrikant Shinde) यांच्या वाढदिवसानिमित्त, अनिकेत जावळकरने कुख्यात गुंड शरद मोहोळच्या टोळीतील नंबरकारी (सह-आरोपी) हेमंत दाभेकर याची, खासदार श्रीकांत शिंदे यांच्यासोबत भेट घडवून आणली होती. या भेटीचा फोटो अनिकेत जावळकरने सोशल मीडियावर पोस्ट केला होता. याबाबत मटा ऑनलाइन माध्यमात बातमी प्रसिद्ध झाल्यानंतर, ४ एप्रिल २०२४ रोजी अनिकेत जावळकरची शिंदे गटातून हकालपट्टी करण्यात आली. त्याच दरम्यान, कल्याण पूर्वचे आमदार गणपत गायकवाड यांनी पोलीस ठाण्यात शिवसेना (शिंदे गट) शहर प्रमुख महेश गायकवाड यांच्यावर गोळीबार केल्याचा प्रकार ताजा होता. या घटनेनंतर गुंड हेमंत दाभेकर याने खासदार श्रीकांत शिंदे यांची भेट घेतल्याची चर्चा रंगली होती.
विरोधक आक्रमक
मुख्यमंत्री एकनाथ शिंदे यांच्या नेतृत्वाखाली गुन्हेगारांना राजकीय अभय मिळते का? असा प्रश्न विरोधकांनी उपस्थित केला आहे. यापूर्वीही, पुण्यातील कुख्यात गुंड निलेश घायवळ याचा मंत्रालयातील व्हिडिओ व्हायरल झाला होता. त्यासोबतच, अनेक नेत्यांसोबत गुंडांचे फोटो समोर आल्याने राजकीय नेते गुन्हेगारांना कसे अभय देतात, हे स्पष्ट झाले होते. परंतु, पुण्यातील अनिकेत जावळकर ज्याच्यावर शिवसेनेतून हकालपट्टीची कारवाई झाली होती त्यानेच वारजे चौकात ‘फिक्स्ड नगरसेवक’ असे बॅनर लावले आहेत. याबाबत शिंदे गटाचे स्पष्टीकरण काय असेल, याकडे सर्वांचे लक्ष लागले आहे.