राष्ट्रवादी काँग्रेसचे नेते हसन मुश्रीफ यांनी काही महिन्यांपूर्वी जयंत पाटलांबद्दल एक विधान केले होते. माझं कशात मन लागत नाही, असे जयंत पाटील म्हणाल्याचा दावा मुश्रीफांनी केला होता. हा दावा खोडताना एका वृत्तवाहिनीला बोलताना जयंत पाटील म्हणाले, ‘मन रमत नाही, असं मी मुश्रीफांना सांगण्याचा प्रसंग मला काही आठवत नाही. मी कधी त्यांना असं बोललो नाही. त्यांनीच उलट मला एकदा भेटून सांगितलं की, एकत्रित यायचं काहीतरी बघा. तुमच्याच हातात सगळं आहे. तुम्ही जरा शरद पवार साहेबांना सांगा आणि एक व्हा, असं त्यांनी मला सांगितलं. एकदा विधानसभेत भेटलेले, निवडणूक झाल्यानंतर. जयंत पाटील यांच्या या दाव्यानंतर आता शरद पवार यांच्या पक्षाचे नेते हर्षवर्धन पाटील यांनी केलेल्या एका विधानाने सर्वांच्याच भुवया उंचावल्या आहेत.

पुण्यात झालेल्या पत्रकार परिषदेत हर्षवर्धन पाटील म्हणाले, ‘आधी तो पक्ष एकच होता, त्या पक्षाचे दोन पक्ष झाले. साहजिकपणे बऱ्याच जणांचं म्हणणं असतं की दोन्ही पक्ष एकत्र यावेत. आमच्या पक्षाचे अध्यक्ष शरद पवार आहेत आणि त्यांच्या पक्षाचे अध्यक्ष अजित पवार आहेत त्यामुळे हा प्रश्न मला विचारण्यापेक्षा त्यांना विचारला तर बरं होईल’. आता हर्षवर्धन पाटील यांच्या वक्तव्यानंतर पुन्हा दोनही राष्ट्रवादी एकत्र येणार का? या चर्चा सुरू झाल्या आहेत.

दरम्यान, अजित पवार आणि जयंत पाटील यांच्यातील आजच्या भेटीवर देखील हर्षवर्धन पाटील यांनी प्रतिक्रिया दिली आहे. अजित पवार आणि जयंत पाटील यांच्यातील बैठक AIच्या संदर्भात झाली. अजित पवार आणि जयंत पाटील व्ही.एस.आय च्या इन्वेस्टमेंट कमिटीमध्ये आहेत या कमिटीची ती मिटिंग होती. त्या बैठकीमध्ये मी आतमध्ये नव्हतो. तिथं मी जर आत असतो तर तुम्हाला उत्तर दिले असते, याचा खुलासा अजित पवार यांनी केला आहे. असे हर्षवर्धन पाटील म्हणाले आहेत.