बुधवारी (१९ मार्च) सकाळच्या सुमारास आयटी हब असलेल्या हिंजवडी येथे एका मिनी बसला अचानक आग लागली. ही आग इतकी भीषण होती की त्यात मिनी बस पूर्णपणे जळून खाक झाली, तर या आगीत अकडलेल्या चार कर्मचाऱ्यांचा तर अक्षरश: कोळसा झाला. या घटनेत गाडीचा चालक आणि पाच जण जखमी झाल्याचीही महिती होती. या आगीचया घटनेने संपूर्ण पुणे हादरुन गेलं होतं. मात्र, जेव्हा पोलिसांनी या प्रकरणाचा तपास सुरु केला तेव्हा त्यांच्यासमोर वेगळीच कहाणी आली. गाडीचा चालक जनार्दनचा दिवाळीचा पगार त्याच्या मालकाने कापला होता. तसेच, गाडीतील काही कर्मचाऱ्यांनी डबा खाऊ दिला नसल्याने त्याला राग आला आणि त्यातून त्याने हे केल्याचं समोर आलं.
Pune Bus Fire: आगपेटी, बेंजामिन केमिकल, कापडाचे तुकडे, रस्त्यात बस थांबवली अन्… हिंजवडी घटनेची थरारक कहाणी

पोलिसांना चालकावर संशय कसा आला?

घटना घडल्यानंतर जखमींना रुग्णालयात दाखल करण्यात आले. यावेळी जनार्दन हंबर्डीकरला भाजल्यामुळे झालेल्या जखमा आणि तो दाखवत असलेल्या वेदना यात तफावत असल्याचं पोलिसांच्या लक्षात आलं. किरकोळ जखमी असूनही तो वारंवार शुद्ध हरपल्याचं नाटक करत होता. हे तिथे उपस्थित असलेले वरिष्ठ पोलिस निरीक्षक कन्हैय्या थोरात यांच्या लक्षात आले. जेव्हा पोलिसांनी त्यांच्याकडे या घटनेबाबत चौकशी केली तेव्हा तो उडवाउडवीची उत्तरं देत होता. त्यामुळे पोलिसांचा संशय अधिक बळावला.

त्यानंतर पोलिसांनी परिसरातील सीसीटीव्ही फुटेज तपासण्याचा निर्णय घेतला. तेव्हा घटनास्थळाजवळील एका कंपनीच्या सीसीटीव्हीमध्ये चालक गाडीच्या सीटखाली काहीतरी पेटवत असल्याचं निदर्शनास आलं. तसेच, आग लागताच हंबर्डीकर हा गाडीतून उतरल्याचंही या सीसीटीव्ही फुटेजमध्ये दिसलं. त्यामुळे काहीतरी गडबड असल्याचं पोलिसांच्या लक्षात आलं.

त्यामुळे पोलिसांनी जनार्दन हंबर्डीकरची कसून चौकशी केली. तेव्हा त्याने गुन्ह्याची कबुली दिली. त्याने पोलिसांना जे सांगितलं त्याने साऱ्यांनाच धक्का बसला. कर्मचाऱ्यांचा राग आल्याने त्याने गाडीला आग लावून त्यांना मारण्याचा कट रचल्याचं त्याने पोलिसांना सांगितलं.