जळगावात माजी उपसरपंचाची हत्या

जळगाव तालुक्यातील गावात किरकोळ वादातून ३६ वर्षीय माजी उपसरपंचाच्या छातीत धारदार शस्त्राने वार करून निर्घृण खून केल्याची घटना शुक्रवारी २१ मार्च रोजी सकाळी ८ वाजता घडली आहे. ही घटना घडल्यानंतर जिल्हा शासकीय वैद्यकीय महाविद्यालयात नातेवाईकांची गर्दी झाल्याचे पाहायला मिळाले. युवराज सोपान कोळी (वय ३६ रा. कानसवाडा ता. जळगाव) अशी मयत झालेल्या उपसरपंचाचे नाव आहे.

युवराज सोपान कोळी हे आपल्या आई-वडील, तीन मुलं, पत्नी यांच्यासह वास्तव्याला होते. शेतीचे काम करून ते आपला उदरनिर्वाह करत होते. युवराज कोळी यांचे गुरुवारी रात्री काही लोकांसोबत वाद झाला होता. या वादातून अज्ञात तीन जणांनी चाकू आणि चॉपरने वार करून त्यांचा खून केल्याची माहिती आहे.

जेव्हा घटना घडली तेव्हा काही शेतकरी तिथे उपस्थित होते. त्यांनी तात्काळ घटनास्थळी धाव घेतली, मात्र तोपर्यंत मारेकरी कोळी यांच्यावर वार करुन पसार झाले होते. त्यानंतर शेतकऱ्यांनी युवराज यांना तातडीने शासकीय वैद्यकीय महाविद्यालयात दाखल केले. यावेळी वैद्यकीय अधिकारी यांनी तपासून त्यांना मृत घोषित केले. यावेळी नातेवाईकांनी जिल्हा शासकीय वैद्यकीय महाविद्यालयात प्रचंड गर्दी करत आक्रोश केला होता. मयत हे शिंदे गटाचे माजी उपसरपंच असल्याची माहिती गावकऱ्यांनी दिली आहे.