Yugendra Pawar on malegaon election : कार्यकर्त्यांची इच्छा असेल तर आम्हाला ठामपणे त्यांच्यामागे उभे राहावे लागेल. सक्षम उमेदवार मिळत असतील तर आणि माळेगावचा छत्रपती होवू द्यायचा नसेल, तर निवडणूक लढवावी लागेल, असे म्हणत युगेंद्र पवारांनी पुन्हा निवडणूक लढवण्याचे संकेत दिले आहेत.
शरद पवार यांच्या बारामती दौऱ्यात शनिवारी माळेगावचे काही सभासद त्यांना भेटले. याविषयी युगेंद्र पवार यांना विचारणा केली असता ते म्हणाले, शरद पवार यांच्याकडे सभासद नेहमीच वेगवेगळे प्रश्न घेवून येत असतात. माळेगावचे अध्यक्ष केशवराव जगताप यांनी आंदोलनावर केलेल्या टीकेचा युगेंद्र पवार यांनी समाचार घेतला. ते आंदोलन आमच्या पक्षाचे नव्हते तर आंदोलनाला आम्ही पाठींबा दिला होता. सर्वपक्षीय सभासद आंदोलनात होते. त्यात माळेगावच्या अध्यक्षांनी राजकारण आणू नये, असे युगेंद्र पवार म्हणाले.
कामगारांना पगार वेळेवर मिळत नाहीत, रसायनयुक्त पाणी नदीत सोडले जात आहे. ऊसाला योग्य दर दिलेला नाही. कधी तरी एकदा चांगला दर दिला तेच सातत्याने सांगितले जात आहे. मग छत्रपतीनेही १५ वर्षांपूर्वी चांगला दर दिला होता, तेच सांगायचे का, असा सवाल युगेंद्र यांनी केला.
माळेगावच्या कार्यक्षेत्रातील खांडज ग्रामपंचायतीने दुषित पाण्यासंबंधी ठराव केला आहे. मी तेथे भेट दिली. दुषित पाणी शेतीला दिल्याने, पिल्याने कर्करुग्ण वाढत आहेत. मासे मृत्यूमुखी पडत आहेत. शेतकऱयांचे टनेज घटत आहे, असे ते म्हणाले. माळेगावचे अध्यक्ष माझ्या शरयू कारखान्याच्या दराबाबत बोलले. माझा कारखाना ज्या तालुक्यात आहे, तिथे आम्ही क्रमांक एकचा दर देत आहोत. तो सहकारी नव्हे तर खासगी कारखाना आहे. कर्ज काढून मी तो कष्टाने चालवत आहे. त्यांचे (केशवराव जगताप यांच्या नेत्यांचे) सात-आठ खासगी कारखाने आहेत. मी जर बोलायला लागलो तर मग त्यांना ते जड जाईल.
लेखकाबद्दलविमल पाटीलविमल पाटील, महाराष्ट्र टाइम्स ऑनलाईनमध्ये कंसल्टंट म्हणून कार्यरत आहे. याआधी सामना, आरएनओ वृत्तसंस्थेमध्ये रिपोर्टर म्हणून काम केलं आहे. पत्रकारिता क्षेत्रात तीन वर्षांचा अनुभव आहे. राजकीय आणि विश्लेषणात्मक बातम्या लिहण्याची आवड.… आणखी वाचा