प्रयागराज येथून सतीश भोसले ऊर्फ खोक्याभाईला पोलिसांनी अटक केली. खोक्याने केलेल्या मारहाणीचा व्हिडिओ व्हायरल झाल्यानंतर तो फरार झाला होता. दरम्यान, खोक्या अधून-मधून आपण केलेल्या कारनाम्यांच्या स्पष्टीकरणासंबंधीचे व्हिडिओ सोशल मिडियावर पोस्ट करायचा. परंतु पोलिसांच्या हाती लागत नव्हता. अखेरीस अथक प्रयत्नांनंतर पोलिसांनी खोक्याचा मोबाईल नंबर ट्रेस करत प्रयागराज येथून त्याला अटक केली.

खोक्याच्या अटकेनंतर सुरेश धस यांनी आपली प्रतिक्रिया दिली. “खोक्याने केलेल्या मारहाणीत तुम्हालाही सहआरोपी करण्याची मागणी होत आहे” असे पत्रकारांनी विचारले असता धस चांगलेच संतापले आणि म्हणाले की,”सहआरोपी करायला तो काय भाजीपाला आहे का? पुढे बोलताना ते म्हणाले खोक्याला अटक झाली, ही चांगली गोष्ट आहे. तो चुकला, तो आरोपी आहे, त्याला शिक्षा ही व्हायलाच पाहिजे. या प्रकरणात मी हस्तक्षेप करणार नाही. मात्र सहआरोपी करायला तो काय भाजीपाला आहे का? असे कसेही सहआरोपी होतात का?’ असंही यावेळी सुरेश धस यांनी म्हटलं आहे.

मारहाणीचा व्हिडिओ व्हायरल झाल्यानंतर फरार झालेला खोक्या अखेरीस पकडला गेला. खोक्या हा भाजप आमदार सुरेश धस यांचा निकटवर्ती असल्याची चर्चा होत आहे. खोक्याच्या डोक्यावर धसांचा हात आहे, त्यामुळे तो राजरोसपणे गुंडगिरी करत होता असा गंभीर आरोपही धसांवर केला गेला. त्याने आतापर्यंत तब्बल दोनशे हरणाची शिकार केल्याचा आरोप ग्रामस्थांकडून करण्यात येत आहे. तसेच त्याचा पैसे उधळत असतानाचा एक व्हिडीओ देखील समोर आला आहे. त्यामुळे धसांनाही सहआरोपी करण्याची मागणी समाजातून केली जात होती.