एमएमआरडीएच्या माध्यमातून ऐरोली-काटई प्रकल्पाचे काम केले जात असून यासाठी ठाणे महापालिका हद्दीतील विकास आराखड्यातील रस्त्याची उभारणी करण्यात येणार आहे. कौसा, शिळ, डावले, डोमखार आणि देसाई या गावातून जाणारा विकास आराखड्यातील हा रस्ता ४५ ते ६५ मी. रुंदीचा असला तरी सुरुवातीला या रस्त्यापैकी ३० मीटर रस्त्यांच्या रुंदीकरणासाठी कामे हाती घेण्यात आले होते. त्यासाठी ठाणे महापालिकेकडून २५४ कोटींच्या मोबदल्याचा प्रस्ताव तयार करण्यात आल्यानंतर जिल्हा प्रशासनाकडून यासंदर्भात भूसंपादन प्रक्रीया सुरू करण्यात आली.

रस्त्याचे भूसंपादन टीडीआरच्या माध्यमातून करण्याच्या दृष्टीने नियोजन करण्यात आले होते. परंतु स्थानिक भूखंडधारकांनी टीडीआरला विरोध करून रोख स्वरूपात मोबदला रकमेची मागणी केली होती. त्यानुसार खासगी जमिनीचे संपादन अधिनियमाच्या अनुषंगाने भूसंपादन प्रस्ताव तयार करण्यात आला आहे. परंतु एमएमआरडीएकडून आता ह्या रस्त्याचे रुंदीकरण ४५ मीटरपर्यंत करण्याचे कळवण्यात आल्याने महापालिकेवरील भूसंपादन मोबदल्याचा भार वाढला आहे. परंतु ठाणे महापालिकेच्या आर्थिक स्थिती लक्षात घेता महापालिकेस हा भूसंपादन खर्च शक्य होणार नसल्याने सरकारकडून खर्च मिळवण्यासाठीही महापालिकेचे प्रयत्न सुरू झाले आहे.

■ ऐरोली-काटई नाका रस्त्यासाठी बाधित क्षेत्र
■ खासगी मालकीचे क्षेत्र: कौसा, शिळ, डावले, डोमखार आणि देसाई या गावांमधील एकूण १८०८१९ चौमी
■ शासकीय मालकीचे क्षेत्रः डावले, देसाई येथील एकूण १७०९४ चौमी
■ टीडीआर/डीआच्या माध्यमातून प्राप्त क्षेत्र : १३५७९ चौमी

४०८ कोटी ७५ लाखांचा मोबदला
खासगी मालकीच्या जमिनीचे भूसंपादन करण्यासाठी २०२४-२५च्या रेडी रेकनर दरानुसार मोबदला निश्चित करण्यात आला आहे. त्यानुसार कौसा, शिळ, डावले, डोमखार आणि देसाई या गावांमधील १८०८१९ चौमी क्षेत्रासाठी एकूण १५७ कोटी ९६ लाख ८४ हजार इतके मूल्य निश्चित करण्यात आले आहे. मोबदल्याच्या रकमेमध्ये (१००%) दिलासा रक्कम, २५ टक्के वाढ असे सुमारे १२५ टक्के वाढीव रक्कम अशी एकूण ३९४ कोटी ९२ लाख ११ हजार ७५० कोटी जमीन मालकांना मिळणार आहेत. याशिवाय भूसंपादन शुल्क २ टक्के, सोयीसुविधा शुल्क १ टक्का आणि शासकीय मोजणी व अनुषंगिक शासकीय शुल्क ०.५ टक्के मिळून या भूसंपादनासाठी ४०८ कोटी ७५ लाखांचा मोबदला देण्याचा प्रस्तावर मंजूर करण्यात आला आहे.