भुयारी मार्गिकच्या वाढीव खर्चासाठी महापालिकेच्या सर्वसाधारण सभेने नुकतीच मान्यता दिली असून, त्यासाठी महापालिकेवर ६८ कोटी रुपयांचा अतिरिक्त भार पडणार आहे. या मार्गिकसाठीच्या वाढीव खर्चाला राज्य सरकारकडून मान्यता देण्याचे आश्वासन उपमुख्यमंत्री व पालकमंत्री अजित पवार यांनी दिल्याने सुधारित निविदा काढून एप्रिलपर्यंत काम सुरू करण्याचे उद्दिष्ट महामेट्रोने निश्चित केले आहे.

काय होता मूळ प्रस्ताव?

स्वारगेट ते कात्रज दरम्यानच्या मेट्रोच्या ५.४६३ किमीच्या विस्तारित मार्गावर मूळ प्रकल्प आराखड्यानुसार तीन स्थानके निश्चित करण्यात आली होती. मार्केट यार्ड, पद्यावती आणि कात्रज अशा तीन स्थानकांमधील अंतर जास्त असल्याने आणखी दोन स्थानकांचा समावेश करण्याची मागणी नागरिकांसह लोकप्रतिनिधींनी महामेट्रोकडे केली होती. पुणे महापालिकेच्या स्थायी समितीने आणि सर्वसाधारण सभेने नव्याने दोन स्थानकांच्या सुधारित प्रस्तावाला नुकतीच मान्यता दिली आहे. मूळ आराखड्यानुसार महापालिकेला १८१ कोटी रूपये खर्चे करावे लागणार होते. त्याऐवजी आता २५० कोटी रूपये खर्च करावे लागणार आहेत.

नवीन स्थानके कुठे?

मूळ आराखड्यानुसार तीन स्थानकांऐवजी आता आणखी दोन नव्या स्थानकांचा समावेश केला गेला आहे. यामध्ये बिबवेवाडी आणि बालाजीनगर अशा दोन स्थानकांचा समावेश आहे. बिबवेवाडी येथील स्थानक अण्णा भाऊ साठे स्मारकाजवळ असेल. तर, पद्मावती येथील स्थानकाची जागा शंकर महाराज मठाच्या समोरील बाजूस निश्चित करण्यात आली आहे. त्याशिवाय, बालाजीनगर येथील स्थानक भारती विद्यापीठाच्या मुख्य प्रवेशद्वारासमोर (राजीव गांधी प्राणी संग्रहालय) असेल, तर अखेरच्या कात्रज स्थानकाची जागा बदलण्यात आली असून पुणे महानगर परिवहन महामंडळाच्या (पीएमपी) कात्रज येथील बस स्थानकाखालीच मेट्रो स्थानकाचे बांधकाम केले जाणार आहे. कात्रज येथील मेट्रो स्थानकामध्ये बदल केल्याने मार्गिकेचे अंतर थोडेसे वाढणार आहे.