कुख्यात गुंड अरुण गवळी याच्या मुलीचे लग्न मुंबईत मोठ्या थाटामाटात पार पडले. या लग्न सोहळ्याला राजकीय जगतातील बड्या नेत्यांनी सहभाग घेतला होता. अरुण गवळी यांची धाकटी मुलगी अस्मिता गवळी हिचे लग्न झाले. करण असे जावयाचे नाव असून तो भाजीचा व्यवसाय करतो. मुंबईतील रेडिओ क्लबमध्ये लग्न आणि सर्व कार्यक्रम आयोजित करण्यात आला होता. या लग्नाला महाराष्ट्रातील अनेक ज्येष्ठ नेते उपस्थित होते. मनसे अध्यक्ष राज ठाकरे, नेते बाळा नांदगावकर या लग्नाला उपस्थित राहिले होते. या लग्न सोहळ्यामध्ये राज ठाकरेंची एंन्ट्री आणि त्यांनी आणि अरुण गवळी यांनी समोरासमोर आल्यानंतर केलेलं हस्तांदोलन याचा व्हिडिओ सध्या सोशल मिडियावर व्हायरल होताना दिसत आहे. उद्धव ठाकरे यांचे निकटवर्तीय मिलिंद नार्वेकर, अजय चौधरीही या लग्नाला उपस्थित होते. यासोबत भाजपा आमदार कालिदास कोळमकर, काँग्रेस नेते मधु चव्हाण यांची सुद्धा उपस्थितीही या लग्न सोहळ्यात पाहायला मिळाली. सध्या हे फोटो आणि व्हिडिओ सध्या सोशल मिडियावर व्हायरल होत आहेत.