कंटेनर कारवर पलटी होऊन अपघात

ठाण्यावरून वडखळकडे जाणाऱ्या एका एसएक्स ४ कारला भरधाव वेगात जाणाऱ्या कंटेनरने जोरदार धडक दिली. ही धडक इतकी जोरदार होती की कंटेनर थेट कारवर पलटला. ज्यामध्ये कारचा चेंदामेंदा झाला. यामध्ये एकाचा जागीच मृत्यू झाला तर एक गंभीर जखमी आहे. पनवेल पोलीस स्टेशन हद्दीत कर्नाळामध्ये ही दुर्घटना घडल्याची माहिती आहे. हा अपघात घडल्याची माहिती मिळताच पोलिसांनी तात्काळ घटनास्थळी धाव घेतली.

यामध्ये दुर्दैवी अपघातात कारमधील दोघांपैकी एका व्यक्तीचा मृत्यू झाला आहे. तर गाडीमधील महिला गंभीररित्या जखमी झाल्याचे प्राथमिक वृत्त मिळत आहे. अपघातानंतर स्थानिक नागरिकांनी तात्काळ धाव घेत जखमींना गाडीबाहेर काढलं आणि त्यांना तात्काळ रुग्णालयात पाठवण्यात आलं. यावेळी डॉक्टरांनी एकाला तपासून मृत घोषित करण्यात आलं. हायड्राच्या सहाय्याने गाडीवरील पलटलेला कंटेनर बाजूला काढण्यात आला आहे.

याबाबत मिळालेल्या प्राथमिक माहितीनुसार, SX 4 कारमध्ये असलेल्या पल्लवी जोशी या कार मालक आहेत. तर, ड्रायव्हर जगदीश हाजरा यांच्या सोबत ठाण्याहून वडखळ कडे जात होते. ते कर्नाळा खिंडीत आले असता भरता वेगात येणाऱ्या कंटेनर ने गाडीला जोरदार धडक दिली आणि गाडीवरच पलटी झाला. या अपघाताची भीषणता गाडीची अवस्था पाहूनच लक्षात येते. SX4 गाडीचा अक्षरशः चक्काचूर झाला असून चालक जगदीश हाजरा यांना या अपघातात आपले प्राण गमवावे लागलेत. तर पल्लवी जोशी या गंभीररित्या जखमी झाल्या असून त्यांना उपचारासाठी तत्काळ रुग्णालयात दाखल करण्यात आले आहे. या घटनेने महामार्गावर काही काळ वाहतूक कोंडी झाली होती.