शिर्डीत झालेल्या दुहेरी हत्याकांडानंतर साई नगरी हादरली. सोमवारी पहाटे साई संस्थानच्या दोन कर्मचाऱ्यांना संपवल्यानंतर आरोपींनी एका इसमावर प्राण घातक हल्ला केला होता. कोणत्या कारणाने हे हत्याकांड घडले ? असा प्रश्न अनेकांना पडला होता. आरोपींनी वेगवेगळया ठिकाणी तिघांवर हल्ला केला यात दोघांचा मृत्यू झालाय. एका आरोपीला पोलीसांनी ताब्यात घेतल्यानंतर मुख्य आरोपी मात्र फरार होता. मंगळवारी संध्याकाळी या घटनेतील मुख्य आरोपीला जेरबंद करण्यात अहिल्यानगर स्थानिक गुन्हे शाखा पथक आणि शिर्डी पोलिसांना यश आले असून हत्या करण्याचे कारण ही समोर आले आहे. लुटमार करण्याच्या उद्देशानं हा हल्ला केल्याचं समोर आलं आहे. या संदर्भातील अधिक माहिती शिर्डी पोलिसांनी दिली आहे.