पुण्यात एका कामगाराला मुलीसाठ लग्नाची मागणी घातल्यावर त्याच्या वयामुळे मारहाण करण्यात आली होती, ज्यामुळे त्याच्या मृत्यू झाला. पोलिसांनी आरोपींविरोधात खुनाचा गुन्हा दाखल करून दोघांना अटक केली आहे. ही घटना गोखलेनगरच्या ओंबाळे मैदानावर झाली होती. 45 वर्षीय कामगार दिलीप अलकुंटे यांना मारहाण करणाऱ्या आरोपींमध्ये रामजी राठोड तसेच त्याचे कुटुंबीयांचा समावेश आहे.
दिलीप अलकुंटे एका गॅरेजवर काम करतात, तर आरोपी रामजी राठोड हे बिगारी कामगार आहेत. दिलीप याने रामजी राठोड यांच्याकडे त्यांच्या मुलीशी लग्न करायचे असल्याची इच्छा व्यक्त केली. त्या वेळी आरोपींनी ‘तुझे वय काय, आमच्या मुलीचे वय काय,’ असे म्हणत त्याला लाथाबुक्क्यांनी मारहाण केली. ‘याला आता जिवंत गाडू’ अशी धमकी देऊन आरोपी दिलीपला बेदम मारहाण करीत होते. या मारहाणीत दिलीप गंभीर जखमी होऊन खाली कोसळला. पोलिसांनी घटनास्थळी धाव घेऊन दिलीपला ससून रुग्णालयात नेले. रविवारी सकाळी दिलीपचा मृत्यू झाल्याचे डॉक्टरांनी घोषित केले. सहायक निरीक्षक दादाराजे पवार तपास करीत आहेत.
दिलीप यल्लपा अलकुंटे (वय ४५, रा. जनता वसाहत) असे मृत्यू झालेल्या कामगाराचे नाव आहे. त्याला बेदम मारहाण केल्याप्रकरणी रामजी निलू राठोड (वय ५०), अनुसया रामजी राठोड (वय ४५), करण रामजी राठोड (वय १९) यांच्यासह एकूण चार जणांविरोधात प्रथम खुनाचा प्रयत्न केल्याप्रकरणी गुन्हा दाखल करण्यात आला होता. ससून रुग्णालयात उपचार घेताना दिलीप अलकुंटे यांचा मृत्यू झाल्याने आरोपींविरोधात कलमवाढ करून खुनाचा गुन्हा दाखल करण्यात आले असून, रामजी व अनुसया यांना अटक करण्यात आल्याचे चतुःशृंगी पोलिस ठाण्याचे वरिष्ठ निरीक्षक विजयानंद पाटील यांनी सांगितले. या प्रकरणी दिलीप अलकुंटे यांच्या वहिनी पुष्पा राजेश अलकुंटे यांनी तक्रार दिली होती. ही घटना शनिवारी (१ फेब्रुवारी) रात्री साडेदहाच्या सुमारास गोखलेनगर येथील ओंबाळे मैदानावर घडली.
लेखकाबद्दलहरिश मालुसरे महाराष्ट्र टाइम्स ऑनलाईन टीममध्ये सिनिअर डिजिटल कंटेंट प्रोड्युसर म्हणून कार्यरत. क्रीडा, राजकीय आणि क्राईम बातम्यांमध्ये विशेष आवड. झी 24 तास आणि टीव्ही9 मराठीसह पत्रकारिता क्षेत्रात 04 वर्षांचा अनुभव.… आणखी वाचा