कल्याण डोंबिवलीत पुन्हा एकदा मराठी विरुद्ध अमराठी असा वाद उफाळून आला आहे. सत्यनारायणाची महापूजा आणि हळदी-कुंकू कार्यक्रमावरून डोंबिवलीच्या नांदिवली परिसरातून ही धक्कादायक बातमी समोर आली आहे. नांदिवलीतील एका सोसायटीत सत्यनारायणची पूजा आणि हळदी-कुंकू समारंभाला सोसायटीतल्या अमराठी रहिवाशांनी विरोध केला. केवळ विरोधच नाही तर मराठी माणसांना शिवीगाळही केल्याने हा वाद उफाळलाय. याच मुद्द्यावरुन मराठी आणि अमराठी नागरिक हे आपापसात भिडले. सोमवारी २७ जानेवारीच्या रात्री सोसायटीमध्ये या वादातून मोठा गोंधळ झाला आणि हे प्रकरण पोलीस ठाण्यापर्यंत पोहोचलं. या प्रकरणी मानपाडा पोलीस ठाण्यात तक्रार देखील नोंदवण्यात आली असून पोलिसांनी पुढील तपास सुरू केला आहे.