१. महागड्या लॅम्बर्गिनी कारमधून एक व्यक्ती मला भेटण्यासाठी मंत्रालयात आली होती, असा आरोप आमदार रोहित पवार यांनी केला. मात्र, त्या कारच्या काळ्या काचा खाली करून पाहिले असते, तर कदाचित कारमध्ये रोहित पवारच दिसले असते, असा टोला जलसंपदामंत्री राधाकृष्ण विखे-पाटील यांनी गुरुवारी नाशिकमध्ये लगावला. आरोप करण्यापूर्वी खात्री तर करायची, असेही ते म्हणाले. बातमी वाचा सविस्तर…
२. कांद्याचे निर्यातशुल्क २० टक्क्याहून शून्यावर आणले जात नसल्याने सरकारला शेतकऱ्यांच्या रोषाला सातत्याने सामोरे जावे लागत असतानाच बांगलादेशमध्ये कांदा आयातीवर १० टक्के शुल्क लागू करण्यात आले. आजपासून (दि. १७) हा निर्णय तेथे लागू करण्यात येणार आहे. भारतामधून निर्यात होणाऱ्या कांद्यापैकी सर्वाधिक कांदा बांगलादेशात निर्यात केला जातो. बांगलादेशचा आयातशुल्काचा निर्णय व केंद्राचा निर्यातशुल्कावरून आडमुठेपणा यामुळे कांद्याच्या निर्यातीत घसरण होण्याची भीती महाराष्ट्र राज्य कांदा उत्पादक शेतकरी संघटनेने व्यक्त केली आहे.

३. प्रजासत्ताकदिन जवळ येत असल्याने जिल्हा मुख्यालयात पालकमंत्र्यांच्या हस्ते ध्वजवंदन व्हावे, यासाठी येत्या दोन दिवसांत पालकमंत्रिपदाच्या वाटपाबाबत महायुतीच्या नेत्यांची बैठक होणार आहे. ज्या जिल्ह्यातील पालकमंत्रिपदाबाबत वाद आहेत, त्यावर या बैठकीत तोडगा काढत पालकमंत्रिपदे जाहीर केली जाणार असल्याचे कळते.

४. कर्जत रेल्वे यार्ड सुधारणेच्या कामांसाठी कर्जत रेल्वे स्थानकातील पोर्टल्स काढून टाकण्यासाठी मध्य रेल्वेने शुक्रवारी आणि रविवारी विशेष ट्रॅफिक आणि पॉवर ब्लॉक घोषित केला आहे. पळसधरी ते भिवपुरी रोड या दरम्यान अप आणि डाउन मार्गावर शुक्रवारी दुपारी १.५० ते दुपारी ३.३५ आणि रविवारी स. ११.२० ते दुपारी १३.०५ दरम्यान ब्लॉक असेल. यामुळे लोकल आणि मेल-एक्स्प्रेस रद्द करण्यात येणार आहेत.

५. मशिद रेल्वे स्थानक परिसरातील पी. डिमेलो मार्गाला जोडणाऱ्या १५४ वर्षे जुन्या कर्नाक पुलाची पुनर्बांधणी सध्या सुरू आहे. पुलाच्या गर्डर उभारणीसाठी २५ जानेवारीची मध्यरात्र ते २६ जानेवारीच्या पहाटेपर्यंत सहा तासांचा विशेष ट्रॅफिक आणि पॉवर ब्लॉक मध्य रेल्वेने घोषित केला आहे. ब्लॉकमुळे रात्री उशिरा धावणाऱ्या उपनगरी आणि लांब पल्ल्यांच्या रेल्वेगाड्यांवर परिणाम होणार आहे.

६. चाकण-शिक्रापूर रस्त्यावर गुरुवारी (१६ जानेवारी) दुपारी एकच्या सुमारास भरधाव कंटेनरने १५ ते २० वाहनांना धडक दिली. भरधाव कंटेनर चाकणहून शिक्रापूरपर्यंत वाहने उडवत गेला. या घटनेत एक पाच वर्षांची मुलगी आणि पोलिस कर्मचाऱ्यासह काही जण गंभीर जखमी झाले असून, अनेक वाहनांचे मोठे नुकसान झाले आहे. बातमी वाचा सविस्तर…

७. बदलापूर मधील बलात्काराच्या घटनेनंतर डोंबिवली जवळील दावडी गावातील एका आठ वर्षांच्या मुलीवर अत्याचार झाल्याची घटना उघडकीस आली आहे. याप्रकरणी पीडित मुलीच्या कुटुंबियांनी मानपाडा पोलीस ठाण्यात तक्रार दाखल केली आहे. मानपाडा पोलिसांनी याप्रकरणी गून्हा दाखल करून आरोपीला बेड्या ठोकल्या आहेत. वैभव जितेंद्र सिंग ( १९ ) असं अटक केलेल्या आरोपीचं नाव आहे.कल्याणच्या जिल्हा सत्र न्यायालयात त्याला हजर केले असून आरोपी सिंग याला दोन दिवसांची पोलीस कोठडी सुनावली आहे.

८. उल्हासनगर विधानसभा मतदारसंघाचे भाजप आमदार कुमार आयलानी यांना पुत्रशोक झाला आहे. कुमार आयलानी यांचे सुपुत्र धीरज आयलानी यांचे निधन झाले. गेल्या काही दिवसांपासून मुंबईतील रुग्णालयात त्यांच्यावर उपचार सुरु होते, अशी माहिती आयलानी कुटुंबाच्या निकटवर्तीयांनी दिली. मात्र उपचारादरम्यान त्यांची प्राणज्योत मालवली. धीरज आयलानी हे उल्हासनगर शहरातील प्रख्यात उद्योजक होते. त्यांच्या निधनाने आयलानी कुटुंबावर दुःखाचा डोंगर कोसळला असून सर्वत्र हळहळ व्यक्त केली जात आहे. भाजप आमदार कुमार आयलानी यांच्या राजकीय कारकिर्दीत धीरज यांचा मोठा वाटा मानला जातो. बातमी वाचा सविस्तर…

९. जुगार खेळण्याच्या नाद तरुणाला चांगलाच महागात पडला आहे. जुगाराच्या नादामुळे तरुणाला आपली पाच एकर जमीन विकावी लागली. एवढे करूनही त्याचे समाधान न झाल्याने त्याने आणखी जुगार खेळण्यास सुरुवात केली. तिथे पैसे कमी पडू लागल्याने त्याने सख्ख्या बहिणीच्या घरातून साडेबारा तोळे सोने लंपास केले.

१०. ‘आपली मुंबई, आपला महाराष्ट्र हा कलाकारांचा आश्रयदाता आहे. कलाकारांसाठी भयमुक्त व पोषक वातावरण असणे, ही सरकारची जबाबदारी आहे. सैफसुद्धा ‘सेफ’ नाही. मोठ्या कलाकारांवर असे हल्ले होणे दुर्दैवी आहे,’ अशी प्रतिक्रिया ‘राष्ट्रवादी काँग्रेस शप’ पक्षाचे नेते, माजी गृहमंत्री अनिल देशमुख यांनी दिली.