वृत्तानुसार, जिल्हा रोहा तालुक्यातील वरसे येथे अल्पवयीन मुलीवर ३० डिसेंबरला अत्याचार झाल्याची घटना घडली आहे. तर ७ जानेवारी दुपारी गुन्हा दाखल करण्यात आला. पोलिसांनी आता नराधमाला बेड्या ठोकल्या आहेत. अटक असलेला आरोपी तेजस पडवळ याच्यावर पोक्सोअंतर्गत गुन्हा दाखल करण्यात आला आहे. आरोपीच्या भावांना ही पोलिसांनी ताब्यात घेतले आहे. तर आरोपीने गावातील अन्य महिला मुलींना मेसेज करून संपर्क करण्याचा प्रयत्न केला असल्याचे बोलले जात आहे. यादृष्टीने पोलीस अधिक तपास करत आहेत.

तेजस पडवळ, वय ३० या नराधमाने याआधीही असे घृणास्पद कृत्य केल्याचे आता उघड होत आहे. अल्पवयीन मुलीवर अत्याचार झाल्याचे समजताच वरसेवासियांमध्ये संतापाची लाट उसळली आहे. अखेर संयम सुटल्याने मंगळवारी रात्री ग्रामस्थांनी रोहा पोलीस ठाण्यावर धडक दिली. आरोपीला तात्काळ अटक करा, फासावर लटकवा अशी मागणी ग्रामस्थांनी केली आहे. आरोपीविरोधात चहूबाजूंनी संताप व्यक्त केला जात आहे‌.

अखेर सर्व आरोपींविरोधात गुन्हा दाखल करण्यात आला असून तेजस गणेश पडवळ, अनुप गणेश पडवळ, दैनिक गणेश पडवळ सर्व राहणार वरसे आरोपींना रोहा पोलिसांनी बेड्या ठोकल्या आहेत. ग्रामस्थांच्या संतापाचे वृत्त पसरताच वरिष्ठ पोलीस अधिकाऱ्यांनीही जातीनिशी प्रकरणात लक्ष घातले आहे. तर आरोपीला जाब विचारायला गेलेल्या फिर्यादीच्या कुटुंबालाच आरोपीच्या भावांनी शिवीगाळ, मारहाण केल्याने संतापात अधिकच भर पडल्याचे चित्र आहे.

पोलिसांच्या माहितीनुसार, घरासमोर सायकल चालवत असताना आरोपी तेजस पडवळ याने सदर मुलीला घरात बोलावून तिच्याशी अश्लील चाळे केले. कोणाला सांगू नकोस नाहीतर तू व तुझी आई दोघेही मराल अशी धमकी सुद्धा तिला दिली. त्यानंतर मुलीने हा प्रकार काकी व वडिलांना सांगितला. याबाबत आरोपीला जाब विचारला असता आरोपीने फिर्यादी व तिचा नवरा, दीर, जाऊ यांना हातबुक्क्याने मारहाण करून शिवीगाळ केली आहे. आरोपीने भावांशी संगनमत करून तक्रारदाराला पोलीस ठाण्यात जाताना अडवले. बाधीत कुटुंबाला मारहाण केली, शिवीगाळ केली. त्यात तक्रारदाराचे दीर जखमी झाल्याचे नमूद करण्यात आले आहे.

अल्पवयीन मुलगी अत्याचार प्रकरणी आरोपी तेजस पडवळ, अनुप पडवळ, दैनिक पडवळ यांच्यावर ७४,७५ (१) ११५ (२) ३५२, ३५१(२) , १२७, (२) ३ (५) बालकांचे लैंगिक अत्याचार संरक्षण अधिनियम २०१२ चे कलम ८, १२ अन्वये गुन्हा दाखल करण्यात आला आहे. हा प्रकार समजताच सायंकाळी उशिरा वरसे ग्रामस्थांनी शेकडोच्या संख्येने रोहा पोलीस ठाण्यावर चाल करून आरोपींविरोधात रोष व्यक्त केला. हे प्रकरण फास्ट ट्रॅकवर चालवण्यासाठी प्रयत्न करणार आणि आरोपींना कठोर शिक्षा होणार, असा विश्वास उपविभागीय पोलीस अधिकारी रवींद्र दौंडकर यांनी दिल्यानंतर ग्रामस्थांचा रोष शांत झाल्याचे वृत्त आहे.