खालापूर तालुक्यातील आडोशी गावातील तरुण तसेच नव्या उमेदीचा कार्यकर्ता रोशन देशमुख या तरुणाचा कामशेत येथे जुन्या महामार्गावर त्याच्या गाडीचा अपघात झाला आणि त्याला जबर मार लागल्याने त्याचा तळेगाव येथील रुग्णालयात उपचारादरम्यान मृत्यू झाल्याची घटना घडल्याने आडोशीसह संपूर्ण परिसरात शोककळा पसरली आहे. सोशल मीडियावर त्याच्या मृत्यूची बातमी समजताच अनेकांना धक्काच बसला असून एक मेहनती हुशार आणि नव्या उमेदीचा कार्यकर्त्या हरपला असल्याची प्रतिक्रिया सर्वत्र व्यक्त होत आहे.

रोशन देशमुख हा कुटुंबासोबत देवदर्शनासाठी अक्कलकोट येथे गेला होता, परतीचा प्रवास करताना रात्रीच्या दरम्यान कामशेत येथे त्याच्या इको कारला वँगनआर कारची धडक बसल्याने त्यात रोशनला जबर मार लागल्याने रुग्णालयात उपचारादरम्यान प्राणज्योत मालवली. रोशनच्या निधनाची बातमी खालापुरात वाऱ्यासारखी पसरली. शनिवारी (४ जानेवारी) दुपारी त्याचा मृतदेह त्याच्या निवासस्थानी आणण्यात आल्याने पत्नी-आई आणि नातेवाईकांच्या आक्रोशाने सारा परिसर दुःखाच्या घाईत गेल्याचं चित्र होतं. त्याचा अंत्यसंस्कार विधी आडोशी येथील अमरधाममध्ये शोकाकुल वातावरणात करण्यात आला.

रोशन देशमुख हा रिक्षा चालक होता. रिक्षा चालवून आपल्या कुटुंबाचा उदरनिर्वाह करत असताना सामाजिक बांधिलकी जपण्याचा कार्य करत होता. खोपोली शिळफाटा येथे वाहतूक कोंडीदरम्यान पोलीस कर्मचारी वर्गाला मदत करण्यासाठी आवर्जून उपस्थित असायचा, सामाजिक कार्य करताना परिसरात त्याची वेगळी ओळख होती.

तर, रोशन देशमुख यांच्या पश्चात आई – वडील – पत्नी आणि लहान अडीच वर्षांचा मुलगा आणि भावंडे असा मोठा परिवार आहे. त्यांच्या अंत्यविधी दरम्यान मोठ्या प्रमाणात सामाजिक – राजकीय – धार्मिक व रिक्षा संघटनेचे रिक्षा चालक – मालक उपस्थित होते.