Beed Marathi News : बीड जिल्ह्यात सरपंच संतोष देशमुख यांच्या हत्येचा तपास सीआयडी, एसआयटी आणि न्यायालयीन पातळीवर सुरु आहे. खासदार बजरंग सोनवणे हे आरोपींना शिक्षा देण्यासाठी तक्रार करत आहेत. सहाय्यक पोलीस निरीक्षक गणेश मुंडे यांनी वादग्रस्त पोस्ट केल्यामुळे पोलीस दलात खळबळ उडाली आहे. एसपी नवनीत कांवत यांच्याकडून मुंडे यांच्यावर काय कारवाई होते हे पाहणे महत्त्वाचे आहे.
दरम्यान बीडचे खासदार बजरंग सोनवणे यांनी मानवाधिकार आयोगाकडे तक्रार करत बीडमधील सपोनि. गणेश मुंडे आणि सपोनि. दहिफळे या दोन सहाय्यक पोलीस निरीक्षक दर्जाच्या अधिकार्‍यांचे कॉल रेकॉर्ड तपासण्याची मागणी केली आहे. खासदार सोनवणे यांच्या मागणीनंतर बीड पोलीस खळबळ उडाली होती.
वादग्रस्त सहाय्यक पोलीस निरीक्षक गणेश मुंडे यांनी ‘बीड पोलीस प्रेस ग्रुप ’वर शनिवारी सायंकाळी एक पोस्ट केली. ज्यामुळे पोलीस दलात वादळ उठले. ‘या खासदाराची चड्डी सुध्दा जागेवर राहणार नाही, मी जर प्रेस घेतली तर’ अशी पोस्ट मुंडे यांनी केली. गणेश मुंडे यांनी एसपींच्या अधिपत्याखाली सुरु केलेल्या बीड पोलीस प्रेस या व्हाटस्अप ग्रुपवर शनिवारी सायंकाळी एक पोस्ट केली. ज्यामध्ये म्हटले होते की, ‘मी जर प्रेस घेतली तर या खासदाराची चड्डी सुध्दा जागेवर राहणार नाही, असे म्हटले आहे.
दहिफळे आणि मुंडे या दोघांबद्दलही सर्वसामान्यासोबतही पोलीस दलात देखील फारसे चांगले बोलले जात नाही. त्यातच सपोनि. या पोस्टवर काही पत्रकारांनी विचारपूस केल्यानंतर सदरील पोस्ट मुंडे यांनी डिलिट केली, आणि स्थागुशाचे पो.नि.उस्मान शेख यांनी मुंडे यांना ग्रुपमधून काढून टाकले. अशा वाचाळ आणि धमकी देणार्‍या पोलीस अधिकार्‍यावर एसपी नवनीत कांवत काय कारवाई करतात, याकडे सर्वांचे लक्ष लागले आहे.