- गणेश वंदना, नमन, मंगळागौर, गोंधळ, बाल्या नृत्य व संगीतमय नृत्यनाट्याचे सादरीकरण
मुंबई, दि. ८ : गणेशोत्सवाला राज्य महोत्सवाचा दर्जा मिळाल्यानिमित्त महाराष्ट्राची समृद्ध लोककला, लोकपरंपरा आणि सांस्कृतिक वैभव देशभर पोहोचविण्याच्या उद्देशाने ‘लोककलेतील श्रीगणेश’ या विशेष सांस्कृतिक कार्यक्रमाचे आयोजन लखनऊ, उत्तर प्रदेश येथे करण्यात आले आहे. महाराष्ट्र शासनाच्या सांस्कृतिक कार्य विभागांतर्गत सांस्कृतिक कार्य संचालनालय, मुंबई यांच्या वतीने हा कार्यक्रम आयोजित करण्यात आला आहे.
सोमवार, 21 सप्टेंबर 2026 रोजी सायंकाळी 6 ते रात्री 9 वाजेपर्यंत कैसरबाग, लखनऊ येथील राय उमानाथ बली प्रेक्षागृह येथे हा सांस्कृतिक कार्यक्रम होणार आहे. महाराष्ट्राच्या पारंपरिक लोककला आणि भक्तिपरंपरेचे दर्शन घडविणाऱ्या गणेश वंदना, नमन, ओवी, मंगळागौर, गोंधळ, बाल्या नृत्य, गौरी-गणपती हिंदी रचना व भजने यांचे सादरीकरण यावेळी करण्यात येणार आहे.
तसेच, संगीत आणि वाद्यवृंदाच्या साथीने संगीतमय नृत्यनाट्य व श्रीगणेश नृत्यकलाविष्कार सादर केला जाणार आहे. विविध लोककला प्रकारांच्या माध्यमातून महाराष्ट्रातील गणेशोत्सवाची वैशिष्ट्यपूर्ण परंपरा, भक्तिभाव आणि लोकजीवनाशी असलेले नाते रसिकांसमोर उलगडणार आहे. श्रीकृष्ण कला फाऊंडेशन यांच्या समन्वयाने हा सांस्कृतिक कार्यक्रम साकारण्यात येणार आहे.
महाराष्ट्राच्या लोककला आणि सांस्कृतिक परंपरांना राज्याच्या सीमा ओलांडून व्यापक व्यासपीठ उपलब्ध करून देणे, तसेच देशाच्या विविध भागांतील रसिकांना महाराष्ट्राच्या सांस्कृतिक वैभवाची ओळख करून देणे, हा या उपक्रमामागील प्रमुख उद्देश आहे. महाराष्ट्राच्या लोकपरंपरेतील विविध कलाप्रकारांच्या सादरीकरणातून गणेशोत्सवाच्या सांस्कृतिक स्वरूपाचे दर्शन देशभर घडविण्याचा प्रयत्न या माध्यमातून करण्यात येत आहे.
हा सांस्कृतिक उपक्रम सांस्कृतिक कार्य, इलेक्ट्रॉनिक्स, माहिती तंत्रज्ञान व कृत्रिम बुद्धिमत्ता मंत्री ॲड. आशिष शेलार यांच्या संकल्पनेतून तसेच सांस्कृतिक कार्य विभागाचे सचिव डॉ. किरण कुलकर्णी यांच्या मार्गदर्शनाखाली आयोजित करण्यात आला आहे. महाराष्ट्रातील विविध लोककला, लोकपरंपरा आणि सांस्कृतिक वारशाचे जतन, संवर्धन व प्रसार करण्यासाठी सांस्कृतिक कार्य संचालनालयामार्फत सातत्याने विविध उपक्रम राबविण्यात येत आहेत.
या कार्यक्रमास प्रवेश विनामूल्य असून लखनऊ आणि परिसरातील रसिकांनी ‘लोककलेतील श्रीगणेश’ या विशेष सांस्कृतिक कार्यक्रमाचा आवर्जून आनंद घ्यावा, असे आवाहन सांस्कृतिक कार्य संचालनालयाचे संचालक प्रशांत खेडेकर यांनी केले आहे.
००००
संजय ओरके/विसंअ