ज्वेल्स ऑफ नवी मुंबईच्या रस्त्यावर दिनांक ३० डिसेंबर रोजी सायंकाळी ७.३० च्या सुमारास मोहम्मद समीम अन्सारी हा सहा वर्षांचा मुलगा एल आणि टी चौकाजवळ रस्ता ओलांडत होता. त्याचवेळी भरधाव वेगात आलेल्या लाल रंगाच्या किया सेल्टोस कारने चिमुरड्याला जबरदस्त धडक दिली. यावेळी कार महिला चालक चालवत असल्याचे प्रत्यक्षदर्शींनी सांगितले. या दुर्घटनेत ६ वर्षीय मुलगा भीषण जखमी झाला आहे.

या दुर्घटनेनंतर महिलेने कार थांबवली आणि ती मुलाला पाहण्यासाठी कारबाहेर आली. तेथे जमा झालेल्या गर्दीने ‘मुलाला हॉस्पिटलमध्ये घेऊन जा’ असे कार चालक महिलेला सुचवले. त्याचदरम्यान त्या मुलाची काकी देखील तिथे आली. मुलाच्या पायाला फ्रॅक्चर झाल्याने मोठ्या प्रमाणात पायातून रक्तस्त्राव होत होता. अखेर कार चालक महिला मुलाला हॉस्पिटलमध्ये नेण्यास तयार झाली.

मुलाच्या काकीला तिने मागून हॉस्पिटलमध्ये येण्यास सांगितले आणि रक्तबंबाळ मुलाला घेऊन ती आपल्या कारने निघाली. तिने गंभीर जखमी मुलाला आपल्या कारमधून तर नेले मात्र कोणत्याही हॉस्पिटलमध्ये न जाता तिने पुन्हा त्या मुलाला अपघातस्थळी आणले आणि रस्त्यावरच टाकून महिलेने घटनास्थळावरून पोबारा केला. या घटनेनंतर या विक्षिप्त कार चालक महिलेविरुद्ध नेरूळ पोलिस ठाण्यात गुन्हा नोंद करण्यात आला आहे. मात्र, या महिलेची अद्याप ओळख पटली नसल्याचे सांगण्यात येत आहे.