Coach : टीम इंडियाचा हेड कोच गौतम गंभीरची विकेट पडण्याची शक्यता, मोठी माहिती समोर

बीसीसीआयची निवड समिती आणि प्रशिक्षक गंभीर यांच्यात बऱ्याच मुद्द्यांवर मतभेद दिसतात. सातत्याने ‘अंतिम अकरा’बाबत प्रयोग करत असल्याने खेळाडूंमध्ये असुरक्षिततेची भावना निर्माण झाली आहे. गंभीरने विश्वास टाकलेला नितीशकुमार रेड्डी चमकला असला, तरी शुभमन गिलबाबतच्या निर्णयांवर अद्याप वादविवाद सुरू असल्याचे कळते. बीसीसीआयचे माजी सचिव जय शहा आता आंतरराष्ट्रीय क्रिकेट परिषदेचे (आयसीसी) प्रमुख झाले असून, त्यांचा उत्तराधिकारी १२ जानेवारीनंतर ठरेल. प्रशासकीय स्तरावर स्थिरता आल्यावर भारतीय संघाबाबत ठोस निर्णय होण्याची शक्यता आहे. या दरम्यान कामगिरी उंचावली नाही, तर गंभीर यांचे प्रशिक्षकपद अल्पकाळाचे ठरू शकते. आयपीएलमधील कोलकाता नाइट रायडर्सचे यशस्वी कर्णधार आणि मार्गदर्शक असलेल्या गंभीर यांना भारताच्या टी-२० संघापुरतेच मर्यादित ठेवावे, असा सूर आधीपासूनच होता. कसोटी आणि वन-डेतील अपयश थांबले नाही, तर गंभीर आपले पद गमावून बसण्याची शक्यता जास्त आहे.