केळी आणि कापूस उत्पादनासाठी जळगांव जिल्हा ओळखला जातो. पण इथल्या दोन शेतकऱ्यांनी पारंपरिक पिकांना फाटा देऊन फळबाग लागवड केली आणि त्यांचं नशीबच चमकलं. केळी आणि कापूस लागवड केल्यानंतर खर्च वजा जाता त्यांच्या हातात काहीही शिल्लक राहत नव्हतं. मात्र त्यांनी पेरूची लागवड केली आणि त्यांचं नशीबच चमकलं.

संदीप गुजर हे चोपडा तालुक्यातील धानोरा इथले तावसे गावचे रहिवासी आहेत. पारंपरिक पद्धतीने शेती करणं फायद्याचं नाही, हे त्यांनी वेळीच ओळखलं. केळी, कापसाला पर्याय म्हणून त्यांनी शेतात पेरूची लागवड केली. पहिल्याच वर्षी त्यांना फायदाच फायदा झाला. विशेष म्हणजे, पेरूच्या विक्रीसाठी त्यांना व्यापाऱ्यांचे पाय धरावे लागले नाही. स्थानिक बाजारपेठेत त्यांनी स्वतः पेरू विकला.

संदीप गुजर यांनी सांगितले की पारंपरिक पद्धतीमध्ये शेती ही परवडत नव्हती. मजुरांची मजुरी दिवसेंदिवस महाग होत होती त्यानंतर सर्व खर्च वजा जाता हातात काहीच शिल्लक राहत नव्हते. लॉकडाऊन च्या काळामध्ये मी दुसऱ्या पर्यायी व्यवसायाच्या शोधात होतो. मात्र युट्युब वरून मी पेरू संदर्भात माहिती मिळवली आणि मी माझ्या शेतामध्ये पेरूचे उत्पादन घेतले. पहिल्याच वर्षी पेरू येणे सुरु झाले. मात्र झाड लहान असल्यामुळे पेरू उत्पन्न कमी प्रमाणात आलं. परंतु त्याच्या दुसऱ्या वर्षी उत्पन्नात मोठ्या प्रमाणात वाढ झाली. इतकंच काय तर संदीप गुजर यांना एक एकर मध्ये लागवड केलेला पेरू गेल्या वर्षी स्वतः विकून तब्बल सहा ते साडेसहा लाखाचा
नफा कमावला.

संदीप गुजर हे एसी मेकॅनिक आहेत. पण त्यांचं पहिलं प्राधान्य शेतीला असतं. त्यांचे आई-वडील आणि पत्नी त्यांना शेती कामात मदत करतात. विशेष म्हणजे, ते सेंद्रिय पद्धतीनं शेती करत असल्यामुळे त्यांचा खर्चही वाचतो. एवढंच नाही तर पेरूच्या बागेत त्यांनी मिश्र पीक पद्धतीचा अवलंब केलाय. त्यामुळे त्यांना दुप्पट फायदा झाला.

शेती परवडत नाही, अशी तक्रार करणारे अनेक शेतकरी आपल्याला भेटतात. पण संदीप गुजर
यांच्यासारखा जगावेगळा विचार केला तर शेती फायद्याची ठरू शकते हे वेगळं सांगायला नको. आपण शेतीमध्ये नवीन पद्धतीने उत्पादन कशा प्रकारे घेऊ शकतो हेच या संदीप गुजर यांच्या पेरू उत्पन्नातून निष्पन्न होते.