शुभांगी शिवा परब (वय ५५) यांचा अपघातात मृत्यू झाला आहे. तर सचिन शिवा परब (दोघेही रा. वझरी, ता. पेडणे, गोवा) असे जखमी मुलाचे नाव आहे. हा अपघात साटेली भेटशील या मार्गावरती मध्यरात्री गुरुवारी १ वाजताच्या दरम्यान घडला आहे. या अपघातामध्ये चालकाला झोप आल्यामुळे ही दुर्घटना घडल्याची प्राथमिक माहिती समोर येत आहे.

मिळालेल्या माहितीनुसार, कोल्हापूर येथे खाजगी रुग्णालयामध्ये उपचार घेत असलेले पती शिवा परब गोवा येथे शिक्षण विभागामध्ये कार्यरत होते. अलीकडच्या काळामध्ये सेवानिवृत्त झाले असून त्यांची प्रकृती अचानक खालवल्यामुळे त्यांना कोल्हापूर येथील खाजगी रुग्णालयामध्ये दाखल करण्यात आले होते. गेल्या चार दिवसांपासून कोल्हापूर येथे उपचार सुरू आहेत. त्यांचा मोठा मुलगा हा गोव्यातील पोलीस खात्यामध्ये कार्यरत असल्याची माहिती समोर येत आहे.

वडिलांच्या तब्येतीची विचारपूस करावी आणि मार्गशीर्ष महिन्यातील गुरुवार असल्यामुळे पूजन करण्यासाठी आईला घरी आणावे यासाठी सचिन आपल्या लहान भावाला घेऊन मामाच्या महिंद्रा स्कार्पिओ गाडीने बुधवारी कोल्हापूर गेला. त्यानंतर सायंकाळी शुभांगी परब या आपल्या लहान मुलाला आपल्या पतीसोबत ठेवून मोठ्या मुलासह घरी येण्यास निघाल्या. मात्र, संध्याकाळची वेळ असल्यामुळे त्यांनी रात्री कुडाचे वाणूशी येथे आपल्या माहेरी मुक्काम केला. त्या दिशेने जात असताना साठलेली भेटशी या मार्गावर रस्त्यालगत असलेल्या कालव्याजवळ गाडीवरचा अचानक ताबा सुटल्याने थेट गाडी ही कालव्यामध्ये कोसळली.

दरम्यान, कालव्यातून पाण्याचा प्रवाह मोठ्या प्रमाणात सुरू असल्यामुळे गाडी पाण्याच्या प्रवाहात वाहू लागली. सचिन गाडीतून बाहेर पडला आणि आईलाही गाडीतून बाहेर काढले. तिच्या नाका तोंडामध्ये पाणी केल्यामुळे तिला प्राथमिक आरोग्य केंद्रामध्ये दाखल केले. मात्र, बराच उशीर झाला होता. डॉक्टरांनी तिला मृत घोषित केले. या घटनेची स्थानिक पोलिसांना माहिती दिल्यानंतर पोलीस घटनास्थळी दाखल झाले आहेत.