SIT probe of sting case over shinde-Fadnavis: तत्कालीन विरोधी पक्षनेते देवेंद्र फडणवीस आणि नगरविकास मंत्री एकनाथ शिंदे यांना अटक करून अ़डचणीत आणण्याच्या एका स्टिंगद्वारे करण्यात आलेल्या दाव्याचे प्रकरण मंगळवारी विधानपरिषदेत चांगलेच तापले. याप्रकरणी एसआयटी गठित करून चौकशी करण्यात येईल अशी माहिती मंत्री शंभुराज देसाई यांनी सभागृहात दिली.
सोमवारपासून टीव्हीवर दाखवण्यात आलेला स्टिंग मुद्दा मंगळवारी भाजपचे प्रवीण दरेकर यांनी उपस्थित केला. राज्यातील विरोधी पक्षनेते देवेंद्र फडणवीस, तत्कालीन नगरविकास मंत्री एकनाथ शिंदे यांच्यावर खोटे गुन्हे दाखल करून अडकवण्याचा कट रचण्यात येत होता. याचे स्टिंग वृत्तवाहिन्यांवर व्हायरल झाले. या स्टिंगमधील संभाषण व व्हिडियो क्लिपचा पेन ड्राइव्ह उपलब्ध आहेत. राज्यातील दोन बड्या नेत्यांना अशाप्रकारे अडकावण्यासाठी अशा प्रकारे षडयंत्र रचण्यात येणे हे अत्यंत धोकादायक आहे. या स्टींगमध्ये तत्कालीन पोलिस महासंचालक संजय पांडे यांनी पोलिस उपायुक्त लक्ष्मीकांत पाटील यांना फडणवीस, शिंदे यांच्यावर गुन्हा दाखल करून त्यांना अडकवण्याचा प्लॅन करा असे आदेश दिले होते. ही क्लिप अवघ्या महाराष्ट्राने पाहिली आहे. या क्लिपमध्ये संजय पुनामिया यांनी शेखर जगताप, एसीपी सरदार पाटील आणि काही लोकांविरोधात तक्रार केली. त्यात जो जबाब दिला तो धक्कादायक आहे. यात एसीपी दर्जाचा अधिकारी सांगतोय, ‘मला भीती वाटते, गुन्हा होऊ शकत नाही मग कसं अडकवता येईल. तरीही डीसीपी पाटील हे पांडेंचे आदेश आहेत, आपल्याला करावे लागते. कुठल्याही परिस्थितीत देवेंद्र फडणवीसांना अडकवता येईल त्यादृष्टीने कारवाई करा,’ असे संभाषण आहे.
दरम्यान त्यावेळी तत्कालीन नगरविकास मंत्री एकनाथ शिंदे यांचे प्रस्थ वाढत होते. शिवसेनेत त्यांचे वलय वाढत असल्याची भीती काहींना होती. बाळासाहेबांच्या विचाराला मूठमाती दिल्याने त्यांच्या मनात वैचारिक बंडखोरीची भावना होती असा आरोपही दरेकरांनी यावेळी महाविकास आघाडीच्या नेत्यांवर केला. या प्रकरणामुळे विरोधकांचा खरा चेहरा हे महाराष्ट्रातील जनतेसमोर आला पाहिजे. या प्रकरणी एसआयटी नेमून चौकशी करावी. डीसीपी लक्ष्मीकांत पाटील यांना तात्काळ निलंबित करा. जे अॅडव्होकेट जनरल शेखर जगताप यांची शासकीय पॅनेलवरून काढून टाका आणि सरकारने तात्काळ निवेदन करावे अशी मागणी दरेकरांनी केली.
यावेळी सरकारच्या वतीने निवेदन करताना मंत्री शंभुराज देसाई यांनी या प्रकरणात एखादा कनिष्ठ अधिकारी स्वताहून याप्रकारे काही करू शकत नाही. त्यामुळे घटनेमागे नेमका सूत्रधार कोणर आहे हे शोधल्या गेले पाहिजे. हे प्रकरण अत्यंत गंभीर आहे. याबाबत मुख्यमंत्री देवेंद्र फडणवीस यांच्याशी चर्चा करण्यात येईल. वरिष्ठ आयपीएस अधिकाऱ्याच्या नेतृत्वात एसआयटी गठीत करून तपास केला जाईल असे देसाई यांनी यावेळी स्पष्ट केले.
लेखकाबद्दलविमल पाटीलविमल पाटील, महाराष्ट्र टाइम्स ऑनलाईनमध्ये कंसल्टंट म्हणून कार्यरत आहे. याआधी सामना, आरएनओ वृत्तसंस्थेमध्ये रिपोर्टर म्हणून काम केलं आहे. पत्रकारिता क्षेत्रात तीन वर्षांचा अनुभव आहे. राजकीय आणि विश्लेषणात्मक बातम्या लिहण्याची आवड…. आणखी वाचा