विधिमंडळ परिसरात ते पत्रकारांशी बोलताना त्यांनी विविध विषयांवर आपली मते व्यक्त केली. “फडणवीसांची भेट आम्ही शुभेच्छा देण्यासाठी घेतली. सत्ताधारी आणि विरोधी अशा दोन्ही पक्षांनी जनतेच्या कल्याणासाठी सभागृहात काम करायला हवे. जनतेतून निवडून आलेल्या आम्हा आमदारांचे म्हणणे मंत्रिमंडळाने ऐकून घेतले पाहिजे. हे सरकार निवडून येण्यात ईव्हीएमची भूमिका संशयास्पद आहे, यावर आमची भूमिका स्पष्ट आहे. मात्र म्हणून अधिवेशनात आम्ही केवळ विरोधाला विरोध करणार नाही. सभागृहात आम्ही योग्य त्या सूचना देतो आहे. त्या शासनाने चांगल्या पद्धतीने स्वीकाराव्या. सकारात्मक वातावरणात आणि शत्रुता न मानता विधिमंडळाचे कामकाज झाले तर महाराष्ट्राच्या जनतेची चांगली सेवा होऊ शकते,” असे ठाकरे म्हणाले.
Parbhani News: पोलीस भरतीत मदत करु म्हणत नोकरीचं आमिष; सोमनाथच्या आईने रोहित पवारांसमोर सारं सांगितलं
महाराष्ट्रात शेतकरी संकटात आहे आणि आजही आत्महत्या वाढत आहे. राज्य सरकारकडे असलेले प्रचंड बहुमत आणि केंद्र सरकारची ताकद या दोन्हींच्या बळावर शासनाने शेतकऱ्यांना चांगला हमीभाव देऊन किंवा इतर प्रकारे मदत केलीच पाहिजे असाही मुद्दा त्यांनी मांडला.

ईव्हीएमद्वारे निवडणुका घेण्यास आमचा विरोध आहे. आम्ही जिंकलो तेव्हाही आम्ही हा मतपत्रिकांच्या आधारेच निवडणुका घेण्याचा मुद्दा मांडला होता. ईव्हीएमच्या संदर्भात अनेक तांत्रिक अडचणी आहेत. आम्हाला व्हीव्हीपॅट मोजण्याची परवानगी मिळावी. ‘वन नेशन, वन इलेक्शन’वर लोकसभेत आधी ईव्हीएमद्वारे मतदान घेण्यात आले आणि नंतर अध्यक्षांनी मतपत्रिकेद्वारे मतदान घ्यायला लावले. जो अधिकार खासदारांना आहे तो अधिकार देशातील संपूर्ण जनतेला मिळायला हवा, असेही त्यांनी सांगितले.

गृहमंत्री कोण हे सांगा?

विरोधी पक्षनेतेपदाचा मुद्दा तांत्रिक आहे आणि त्याबाबत काय मार्ग काढता येईल यावर आम्ही चर्चा करतो आहोत. मात्र, मंत्र्यांना खातेवाटप होणे अत्यंत महत्वाचे आहे. किमान गृहखाते कुणाकडे आहे हे तरी कळायला हवे. इतके राक्षसी बहुमत मिळाले असताना मुख्यमंत्री आणि मंत्र्यांच्या निवडीला वेळ लागला. आता खातेवाटपात विलंब होतो आहे. यानंतर निधीच्या वाटपाचे मुद्दे उपस्थित होते. मंत्रिमंडळ विस्तार होऊनदेखील खातीवाटप झालेले नाही. मंत्री झालेले आणि न झालेले असे अनेक लोक तर गायबच झाले आहेत. ही अशी अदृश्य शक्ती नको, जे काही व्हायचे ते डोळ्यांदेखत व्हावे, असे आदित्य ठाकरे म्हणाले.