याप्रकरणी पंप मालक धैर्यशील पानसरे आणि राहित हरकुर्ली यांच्याविरुद्ध सहकार नगर पोलिसांत गुन्हा दाखल करण्यात आला आहे. घटनेत हर्षद गणेश गेहलोत (रा. शंकर महाराज वसाहत, धनकवडी) या कर्मचाऱ्याला त्याचा डोळा गमवावा लागला.

CNG गॅसचं नोझल उडालं, कर्मचाऱ्याचा डोळा निकामी

याबाबत पोलिसांनी दिलेली माहिती अशी की, हर्षद गेहलोत पंपावर सीएनजी भरण्याचं काम करतात. रविवारी सायंकाळी ते एका दुचाकीमध्ये गॅस भरत होते. या वेळी अचानक गॅसचे नोझल त्यांच्या तोंडावर अतिशय वेगाने उडाले. यामध्ये त्यांच्या डाव्या डोळ्याला गंभीर दुखापत होऊन त्यांना डोळा गमवावा लागला. याप्रकरणी पोलीस हवालदार संदीप चव्हाण तपास करत आहेत.

नोझल वेगात उडून प्रेशरने हर्षदच्या डोळ्यावर लागलं

या घटनेचा व्हिडिओ समोर आला आहे. व्हिडिओमध्ये हर्षद गेहलोत सीएनजी पंपावर दिसत आहेत. त्यांनी एका दुचाकीस्वाराच्या दुचाकीमध्ये सीएनजी भरला. त्यानंतर गॅसचं नोझल जागेवर ठेवलं. पण काही सेकंदात ते नोझल त्यांच्या अंगावर उडालं आणि त्याचा जोरात फटका बसला. नोझल जोरात वेगाने उडून त्याच्या चेहऱ्यावर बसलं. अतिशय प्रेशरने ते हर्षदच्या चेहऱ्यासह, डाव्या डोळ्यावरही लागलं. नोझल इतक्या प्रेशरमध्ये लागलं की हर्षद खाली कोसळला. ते उडालेलं नोझल गोल-गोल फिरुन एका ठिकाणी पडलं.

सीएनजी पंपावरील सर्वच जण या घटनेने घाबरले आणि लांब पळाले. पण नंतर तात्काळ सर्वांनी खाली कोसळलेल्या हर्षदला उचललं. तो जमिनीवर निपचित पडला होता. त्याला रुग्णालयात दाखल करण्यात आलं. मात्र यात हर्षदचा डोळा निकामी झाला. या घटनेने परिसरात हळहळ व्यक्त होत आहे.