Nagpur New Ministers Oath Taking Ceremony: शपथविधीची वेळ दुपारी चार वाजता होती. मात्र, हा सोहळा ४० मिनिटे उशिरा सुरु झाला. परिणामी, सूर्यास्तावेळी राष्ट्रध्वज अर्ध्यावर उतरवताना शपथविधीचा सोहळा काही मिनिटांसाठी थांबवावा लागला होता.
हायलाइट्स:
- माजींना संधी, दिग्गजांचे पत्ते कट
- लोढांची संस्कृतमधून शपथ, इतरांची मराठीत
- आमदार हसन मुश्रीफांची अल्लाहाच्या नावे शपथ
मंत्रिमंडळात पुनरागमन
नव्या मंत्रिमंडळात माजी मंत्र्यांचे पुनरागमन झाले आहे. यापैकी गणेश नाईक हे २००४ ते २०१४ अशी सलग दहा वर्षे मंत्री होते. या काळात त्यांनी राज्य उत्पादन शुल्क, कामगार, वने आणि पर्यावरण ही महत्त्वाची खाती सांभाळली होती. २०१४च्या विधानसभा निवडणुकीत पराभूत झाल्यानंतर नाईक सत्तेबाहेर होते. २०१९मध्ये विधानसभेवर निवडून आलेल्या नाईक यांना भाजपने मंत्रिमंडळात स्थान दिले नव्हते. पंकजा मुंडे या २०१९च्या विधानसभा निवडणुकीत पराभूत झाल्या होत्या. अलीकडेच म्हणजे जुलै महिन्यात भाजपने त्यांची विधान परिषदेवर वर्णी लावली होती. संजय सावकारे हे पृथ्वीराज चव्हाण सरकारमध्ये राज्यमंत्री होते. २०१४मध्ये त्यांनी भाजपमध्ये प्रवेश केला होता. आता दहा वर्षांनंतर त्यांना पुन्हा मंत्रिपद मिळाले आहे. २०१९च्या विधानसभा निवडणुकीच्या तोंडावर तत्कालीन मुख्यमंत्री देवेंद्र फडणवीस यांनी आपल्या मंत्रिमंडळात आशिष शेलार, अशोक उईके, जयकुमार रावल यांना स्थान दिले होते. आता पाच वर्षांनंतर या तिघांची मंत्रिमंडळात वर्णी लागली आहे.
Chhagan Bhujbal: छगन भुजबळ यांचा पक्षातूनच ‘करेक्ट कार्यक्रम’, पवार-तटकरे जोडगोळीकडून कात्रजचा घाट
अजित पवारांचा पाच माजी मंत्र्यांना नारळ
अजित पवार यांनी छगन भुजबळ, दिलीप वळसे पाटील यांच्यासह आपल्या पाच माजी मंत्र्यांना नारळ दिला आहे. त्यात धर्मरावबाबा आत्राम, अनिल भाईदास पाटील आणि संजय बनसोडे यांचा समावेश आहे. यापैकी भुजबळ आणि वळसे पाटील हे राष्ट्रवादी काँग्रेस जेव्हा जेव्हा सत्तेत होती तेव्हापासून जवळपास मंत्रिमंडळात होते. या दोघांना प्रथमच निवडणुकीनंतर राज्यात पक्ष सत्तेत आला असताना मंत्रिमंडळाच्या बाहेर राहावे लागले आहे. भाजपने सुधीर मुनगंटीवार, रवींद्र चव्हाण, विजयकुमार गावीत, सुरेश खाडे या चौघांना मंत्रिपदापासून वंचित ठेवले आहे. यापैकी काही जणांवर भाजपच्या संघटनात्मक कामाची जबाबदारी दिली जाऊ शकते. शिवसेनेने तानाजी सावंत, दीपक केसरकर आणि अब्दुल सत्तार मंत्रिमंडळाच्या बाहेर बसवले आहे.
शपथविधीमध्ये लक्षवेधी गोष्टी
- शपथविधीची वेळ दुपारी चार वाजता होती. मात्र, हा सोहळा ४० मिनिटे उशिरा सुरु झाला. परिणामी, सूर्यास्तावेळी राष्ट्रध्वज अर्ध्यावर उतरवताना शपथविधीचा सोहळा काही मिनिटांसाठी थांबवावा लागला होता.
- रवींद्र चव्हाण, तानाजी सावंत, दीपक केसरकर आदी माजी मंत्र्यांना मंत्रिमंडळातून वगळणार अशी बातमी महाराष्ट्र टाइम्सने सर्वप्रथम दिली होती, रविवारच्या शपथविधीत या मंत्र्यांना वगळण्यात आलेली ती खरी ठरली आहे.
- भाजपच्या मंगलप्रभात लोढा वगळता सर्व मंत्र्यांनी मराठीतून शपथ घेतली. लोढा यांनी संस्कृत भाषेतून मंत्रिपद आणि गोपनीयतेची शपथ ग्रहण केली. राष्ट्रवादीच्या हसन मुश्रीफ यांनी अल्लाहच्या नावे शपथ घेतली.
- पंकजा मुंडे या शपथ घेताना समोर बसलेल्या कार्यकर्त्यांनी गोपीनाथ मुंडे यांच्या नावाचा जयघोष केला. आशिष जयस्वाल यांनी रामटेकच्या श्रीरामाच्या भूमीला वंदन करुन शपथ घेतली.
- शिवसेनेचे भरत गोगावले हे शपथेसाठी उठले तेव्हा जल्लोष झाला. त्यांनी शिवसेनाप्रमुख बाळासाहेब ठाकरे आणि आनंद दिघे यांचे स्मरण केले.
लेखकाबद्दलप्रशांत पाटीलप्रशांत पाटील यांना डिजिटल पत्रकारिता क्षेत्रात ३ वर्षांचा अनुभव आहे. ते ‘महाराष्ट्र टाइम्स ऑनलाइन’मध्ये कंटेंट प्रोड्यूसर म्हणून कार्यरत आहेत. याआधी थोडक्यात, आधान न्यूज वेबपोर्टलमध्ये डेस्कवर काम केलंय. महाराष्ट्रातील घडामोडी बघतात…. आणखी वाचा