Pankaja Munde And Dhananjay Munde : महायुतीतील एकूण ३९ मंत्र्यांनी शपथ घेतली आहे. ज्यामध्ये ३३ कॅबिनेट तर ६ राज्यमंत्र्‍यांचा समावेश आहे. बीडच्या मुंडे घराण्यातील बहीण भावाची मंत्रिमंडळात वर्णी लागली आहे.
राष्ट्रवादी काँग्रेसचे आमदार धनंजय मुंडे आणि भाजपच्या विधानपरिषद आमदार पंकजा मुंडेंनी शपथ घेतली आहे. मध्यंतरी निर्माण झालेल्या कौटुंबिक कलहानंतर मुंडे घराण्यातील बहीण भाऊ एकाच मंत्रिमंडळात पाहायला मिळणार आहेत. बीडमधील मस्साजोग खून प्रकरणी धनंजय मुंडे यांच्यावर आरोप होत असल्याने त्यांची मंत्रि‍पदी वर्णी लागणार की नाही असा प्रश्न उपस्थित झाला होता. रविवारी शपथविधीच्या काही तासांआधीपर्यंत मंत्रि‍पदासाठी त्यांचे नाव निश्चित झाले नव्हते. अखेर त्यांच्या नावावर शिक्कामोर्तब झाला आहे.
मतदारसंघांच्या परिसीमनाच्या आधी रेणापूर विधानसभा मतदारसंघात सलग चार पंचवार्षिकमध्ये गोपीनाथ मुंडे यांचे वर्चस्व होते. परळी विधानसभा मतदारसंघ अस्तित्वात येताच गोपीनाथ मुंडेंच्या कन्या पंकजा मुंडे सलग दोन वेळा विधानसभेत निवडून गेल्या. असे सलग सहा टर्म येथे भाजपची सत्ता राहिली. २०१९च्या निवडणुकीत धनंजय मु्ंडेंनी पहिल्यांदा निवडून येत काका गोपीनाथ मुंडेंची सत्ताश्रृंखला मोडीत काढली होती. धनंजय मुंडे यांनी २०१९ च्या निवडणुकीत शरद पवारांच्या नेतृत्वात मुंडे घराण्यातील प्रस्थापित नेतृत्वाला आव्हान दिले होते. परळी मतदारसंघावर मराठा आणि ओबीसी या जातींचा मोठा प्रभाव आहे. धनंजय मुंडेंनी भाजपचा बालेकिल्ला राष्ट्रवादीकडे खेचून आणला होता. पण २०२२ नंतर राजकीय समीकरण बदलले आणि त्यांनी अजित पवारांची साथ देत महायुतीत सामील झाले.
मागच्या पाच वर्षांत मंत्रिमंडळापासून दूर राहिलेल्या पंकजा मुंडेंचे भाजपने पुनर्वसन केले आहे. पक्षाने त्यांना यंदा विधानपरिषदेवर संधी दिली. आता त्यांनी महायुतीच्या मंत्री म्हणून शपथ घेतली आहे. महायुतीच्या मंत्रिमंडळातील त्या विधानपरिषदेतील एकमेव सदस्या ठरल्या आहेत. त्यामुळे पंकजा मुंडे या आता राज्याच्या राजकारणातील सक्रिय होणार आहेत. गेल्या दशकभराच्या कौटुंबिक कलहावर पडदा पडल्यानंतर आता बहीण भाऊ मंत्रिमंडळात एकत्र काम करताना दिसणार आहेत.
सोळंके आणि धसांना डावललं
बीडमधील राष्ट्रवादीचे काँग्रेसचे ज्येष्ठ नेते तथा आमदार प्रकाश सोळंकेंना पक्षाने डावललं आहे. २०१९ मध्येही महाविकास आघाडीच्या मंत्रिमंडळात त्यांना हुलकावणी देण्यात आली आणि आता महायुतीतही पक्षाने त्यांना नाराज केले आहे. यासोबतच आणखी एका नावाची जोरदार चर्चा सुरु होती ती म्हणजे सुरेश धस यांची. धनंजय मुंडेंचा पत्ता कट झाल्यास त्यांना संधी मिळणार अशी समजत होते. परंतु त्यांनाही पक्षाने डावललं आहे.
लेखकाबद्दलविमल पाटीलविमल पाटील, महाराष्ट्र टाइम्स ऑनलाईनमध्ये कंसल्टंट म्हणून कार्यरत आहे. याआधी सामना, आरएनओ वृत्तसंस्थेमध्ये रिपोर्टर म्हणून काम केलं आहे. पत्रकारिता क्षेत्रात तीन वर्षांचा अनुभव आहे. राजकीय आणि विश्लेषणात्मक बातम्या लिहण्याची आवड…. आणखी वाचा